Naalakkersuisoq ministerilu Camp Century pillugu paasiniaaniartut

Camp Centurymi mingutsitsineq oqartussaasunit ilisimasalinniillu misissorneqassasoq, Danskit avatangiisinut ministeriata, Esben Lunde Larsenip kissaatigaa.

Taamaasilluni danskit nunanut allanut tunngasunut ministeriata, Kristian Jensenip oqariartuutaata assinganik oqariartuuteqarpoq.

Camp Centurymilu qimaannakkat ministerinut misigissuseqartitsivoq, taamaammallu maanna misissuisoqalersoq, Esben Lunde Larsen oqarpoq.

Aamma atuaruk Camp Centurymi pissutsit danskit ministeriata misissortinniarai

- Kikkut akisussaasuunersut, ajornartorsiutip qanoq aaqqiivigineqarnissaa ilaalu ilanngullugit oqaaseqarfiginissaat maanna siusippallaarpoq. Camp Centurymi ajornartorsiutit qanoq angitiginersut oqartussaasunik attuumassuteqartunik ilisimaqartunillu ikioqateqarluta, Kalaallit Nunaannullu qanimut oqaloqateqarluta paasiniassavarput, danskit avatangiisinut ministeriat, Esben Lunde Larsen oqarpoq.

Avatangiisinut naalakkersuisoq, Mala Høy Kúko danskit ministeriitulli oqariartuuteqarpoq.

- Soorunami oqaatiginissaa maannakkuugallartoq ajornakusoorpoq. Paasissutissat erseqqissut pissarsiarigutsigit Naalakkersuisuni soorunami nalilerumaarparput qallunaanik suleqatigiinneq qanoq ingerlaqqissanersoq, Mala Høy Kúko oqarpoq.

Aamma atuaruk Ilisimatuut: Camp Century avatangiisinut ulorianarsinnaavoq

Saliinissamut kikkut akisussaasuunersut sivisuumik paasiniarneqarpoq.

Avatangiisinullu naalakkersuisoq paragraf 37 naapertorlugu apeqquteqaammut akissutimini allappoq, Camp Centurymi mingutsitsinermut misissuinissaq saliinissarlu Danmarkimit USA-miilluunniit akisussaaffigineqarnersoq ukiuni arlalinni paasiniarneqartoq.

Avatangiisinut naalakkersuisoq, Mala Høy Kúko danskillu avatangiisinut ministeriat Esben Lunde Larsen Nunatsinni ulluni makkunani angalapput, ilaatigut USA-miut sakkutooqarfigisimasaannut qimaannakkamut takusaallutik.

Aamma atuaruk Nunanut allanut ministeri: Camp Centurymi qinngornernik ulorianartunik mingutsitsisoqarsimanngilaq