Camp Centurymi pissutsit danskit ministeriata misissortinniarai
Ministeri KNR-imut emailikkut taama ilaatigut allaaserisaqarpoq:
- Silap pissusiata allanngoriartornerata Kalaallit Nunaata siunissaanut sunniuteqaatigisinnaasai, Camp Centurymi pissutsit taakkununnga ilaallutik, uannut soorunami eqqarsalersitsipput. Danmarkip naalakkersuisui immikkut ilisimasallit suleqatigalugit tamakku maanna misissussavai, nunanut allanut tunngasunut ministeri Kristian Jensen KNR-imut oqarpoq.
Akuutissat ulorianartut Camp Centurymit seerilersinnaanissaata aarleqqutigineqarnera matumani pissutaavoq, misissuinerimmi nutaat takutippaat silap pissusiata allanngoriartornerata tamanna aarlerinarsisikkaa.
Aamma atuaruk Ilisimatuut: Camp Century avatangiisinut ulorianarsinnaavoq
Camp Century amerikamiunit Sermersuarmi 1959-imi atulerneqarpoq, Danmarkimik isumaqatigiissusiornerup kingorna atuutilersinneqarluni. Sermersuup iluani sullulialiornikkut assersuutigalugu qaartartut igeriuttakkat inissinneqarsinnaanngorput, nunat killiit taamanikkut Sovjetunioniusimasumit saassunneqaratarsinnaanerannut illersuutissatut atorneqarlutik.
Sakkutooqarfilli ukiut arfineq-pingasut qaangiummata qimaannarneqarpoq, atomreaktorerlu kingorna aamma peerneqarluni. Imerli atomreaktorip atorneqarneraneersoq qinngornernik ulorianartunik akulik Camp Centurymi suli nassaassaasoq immikkut ilisimasallit oqaatigaat.
Aamma atuaruk Nunanut allanut ministeri: Camp Centurymi qinngornernik ulorianartunik mingutsitsisoqarsimanngilaq
Kristian Jensenilli maanna tassa oqaatigaa immikkut ilisimasallit suleqatigalugit, Kalaallit Nunaatalu oqaloqatigilluarneqarneratigut Danmarkimi oqartussanit maanna misissorneqalissasoq.
