Katersuiniarneq: Kinguaassiutitigut atornerluisarnermik NAKUUSA akiuiniaqataalersoq

Katersuiniarnerup qulequtaraa 'Meeqqat tamarmik atornerlugaanermut illersorneqarnissamut pisinnaatitaaffeqarput', NAKUUSA-llu innuttaasut tapersuilluarnissaat neriuutigaa.

Aningaasat katersat, meeqqat kinguaassiutimikkut atornerlugaasimanerinik pasitsaassaqarnermi angajoqqaanut inersimasunullu qanigisaasunut qanoq iliuuseqarnissamut paasissutissanik suliaqarnissamut atorneqassapput. Najaaraq Møller NAKUUSA-mi suliniutinik aqutsisoq taama nassuiaavoq.

- Suliaq pingaaruteqaqaaq, ajoraluartumilli suliniuteqarnissaq pisariaqarluinnarpoq. Taamaattumik qanigisaasut eqqugaariasaarnissaannut upalungaarsornissaat pingaartipparput, aqqusaagaqariasaassappatami qanoq suliniuteqarnissaat paasissutissiissusiarissallugu pingaaruteqarmat, Najaaraq Møller taama oqaluttuarpoq.

Tv-kkut katersuiniarnermi tapersersuerusuttut sms-ikkut 50 koruuninik imaluunniit 150 koruuninik tunissuteqarsinnaassapput. Aamma Facebookikkut unnuup ingerlanerani akitsorterussisoqassaaq.

- Unnuk ilungersunartumik qulequtalik aningaasanik tapersiinissamut periarfissiissaaq, qulequtaq meerarpassuarnut inuusuttuararpassuarnullu peqqinnartumik ineriartornissaraluannut akornusiisoq. Isiginnaartut aallakaatitap ingerlanerani suliniutit assigiiinngitsut pillugit paasissutissiiffigilluarneqassapput, taavalu saniatigut qulequttamut naleqquttunik pulaartoqartarumaarluni, soorunalumi nipilersortoqarlunilu eqqugassaqarluarumaarpoq aamma. Qilanaarpugut neriulluinnarlutalu kikkut tamarmik uunga qulequtarisatsinnut tapersersuilluarumaartut, Najaaraq Møller taama oqarpoq

Katersuiniartoqannginnerani NAKUUSA-p suliffeqarfiit attaveqarfiginiarpai katersuiniarnermut tapiissuteqarnissaminnut periarfissinniarlugit.

KNR TV-meersut Stina Skifte aamma Nathan Kreutzmann unnuk taanna aqutsisuussapput. Katersuiniarneq KNR-ikkut marsip pingajuani aallakaatinneqassaaq.