Kanngunarsaasoqarnera kommunip quarsaarutigigaa
Atuartut arlallit sukamut qilersoriarlugit kivilerneqarput, taamaaliortoqarneralu atuartunit immiunneqarluni.
Kommuneqarfik Sermersuumi Meeqqanut Atuarfinnullu Ingerlatsiviup pisortaata, Helene Broberg Berthelsenip, tamanna tupaallaatigaa, iliuuseqartoqassasorlu oqaatigalugu.
- Inuusuttuarannguanut pissusilersorneq avaanngunarlunilu kingunipilussinnaammat isumaqarpunga sakkortuumik tigusariaqaripput. Kiisalu oqaloqatigiinnikkut killissaa tikillugu, iliuuseqarnissatsinnut pilersaarusiornissamik ammaasariaqartugut, Helene Broberg Berthelsen taama oqarpoq.
Niviarsiaraq 14-inik ukiulik sukamut qilersoriarlugu kivilerneqarsimavoq, taamaaliortoqarneralu atuartunit arlalinnit filmiliarineqarsimalluni. Nukappiaraq 7.klassineersoq aamma kanngunarsarneqarsimavoq.
Helene Broberg Berthelsenip oqaatigaa atuarfiit tamarmik naggataarnersiornermi maleruagassanik peqaraluartut.
-Taamaattumillu politiit suleqatigalutigit tullissaanut naggataarnissamut taakkua sinaakkutissaasut taakkuuinnassanersut apeqquserlutigit ataatsimiititaliamik ullumi pilersitsivugut. Aamma inuusuttortatta pisariaqartippaat tamanna atuarfiup iluani eqqartussallugu, pisortaq oqarpoq.
AAMMA ATUARUK Nakkarsaaneq sakkortuuumik sunniuteqartarpoq
Taamatuttaaq angajoqqaat atuarfinni sinniisaasa tamanna aamma oqallisigisariaqaraat, Kommuneqarfik Sermersuumi Meeqqanut Atuarfinnullu Ingerlatsiviup pisortaa oqarpoq.
- Aamma ajunngilaq angajoqqaat atuarfinni sinniisaasa suliaq taanna tigugaluarunikku, aamma taanna pisariaqarpoq. Tassaniippoq oqartussaaqataaneq, Helene Broberg Berthelsen taama oqarpoq.
AAMMA ATUARUK Jensip pania kanngusaarneqartoq