Inatsisitigut ataataqanngitsut pillugit paasititsiniaanissaq kinguaattoortoq
Danmarkimi isumaginninnermut ministereqarfik KNR-imut taama paasissutissiivoq.
Danskit isumaginninnermut ministeriata februaarimi nalunaarutigaa, upernaamut paasitsiniiasoqarumaartoq. Tassani inatsisitigut ataataqanngisut ataatamik ujarnissaannut piginnaatitaaffii sammineqartussaagaluarput.
Aamma atuaruk Inatsisitigut ataataqanngitsut pillugit paasisitsiniaaqqittoqassaaq
Danmarkimi sumaginninnermut nunamilu namminermi pissutsinut ministereqarfimmi siunnersortaaneq Lars Thøgersen kinguaattoortoqarnera KNR-imut nassuerutigaa.
- Paasititsiniaaneq Kalaallit Nunaat peqatigalugu suliarineqartussaavoq, sulilu naammassinata. Unittooqqavoq puigorneqarsimananili, taanna oqarpoq.
Paasititsiniaanerup saniatigut ministereqarfiup Danmarkimiittup Namminersorlutik Oqartussat peqatigalugit aamma inatsisitigut ataataqanngitsut Kalaallit Nunaanni qassiunersut paasiniartussaavaat. Ataatamik najorneqannginnerup inuttut sunniutigisimasaasa saniatigut, aamma amerlasuut ataatartik pillugu paasissutissaateqaratik ukiorpassuarni inuusariaqarsimapput.
AAMMA ATUARUK Inatsit allanngormat ataatassarsiuussinerit amerlisut
Pilersaarutaasimagaluarpoq Pinngortitamut, Avatangiisinut Inatsisinillu Atuutsitsinermut Naalakkersuisoqarfiup Mala Høy Kúkop aqutaata Danmarkimi ministereqarfik peqatigalugu inatsisitigut ataataqanngitsut qassiunersut paasiniassagaat paasititsiniaallutillu.
Naalakkersuisulli maajimi allanngortiterneqarmata suliat tamarmik kinguaattoorput.
Inatsisinik atuutsitsinermut naalakkersuisoqarfik Mala Høy Kúkomit isumaginninnermut naalakkersuisumut Martha Lund Olsenimut nuunneqarpoq; tamatumalu kinguneranik paasititsiniutigineqartussat nutaamik isumaqatigiissutigisariaqalerlutik.
- Naalakkersuisoqarfiusimasumut isumaqatigiissutit maanna naalakkersuisoqarfimmi nutaami uppernarsisariaqassapput.
Sulili paasinngilarput inatsisitigut ataataqanngitsut qassiunersut kikkullu paasiniassaneraat, naatsorsuutigineqarporli paasititsiniaaneq ukiamut aallartinneqarumaartoq, soorlu nutaamik nittartagaliornikkut - tassani paasiniarneqarsinnaassalluni ataataasoq qanoq ujarneqarsinnaanersoq.
AAMMA ATUARUK Periarfeerussaq" inatsisitigut ataataqanngitsut pillugit aallakaatitassiulersoq
Paasititsiniaanissap kinguaattoornera Nunatsinni inatsisitigut ataataqanngitsuunermik uisitseqqaartut ilaannit Stina Sørensenimit isornartorsiorneqarpoq.
- Aporfiit tamakku piianngikkutsigit ataatsimilluunniit nikeriaqqissinnaanngilagut. Ataataminnimmi kinaassuserseerusuttut aamma inuupput, Stina Sørensen oqarpoq.
