Nalinginnaasumik isumaqatigiinneq ajortut mittarfiit tulleriaarlugit sanaartorniaraat

Aningaasaqarnermut naalakkersuisoq, Aqqaluaq B. Egede naapertorlugu mittarfiit tallineqarnissaanni nunani allamiut sulisorineqangaatsiarsinnaapput.

Inuussutissarsiornermut Suliffeqarnermullu naalakkersuisup, Hans Enoksenip tamanna isumaqatiginngilaa oqarluni nunaqavissut salliunneqarlutik sulisussarsiarineqaqqaartariaqartut.

- Isumaqarluinnarpunga maani nunaqavissut salliuteqqaarlugit sulinerit ingerlanneqartariaqartut, taavalu pisariaqartitat taakkua pisariaqartinneqavippata taava avataaninngaanniit tingusisinnaasungut. Tassa isumaqarluinnaqqissaarpuna aamma aalajangiusimavara nunaqavissut tamatingut salliunneqartarnissaat, Inuussutissarsiornermut Suliffeqarnermullu naalakkersuisoq, Hans Enoksen oqarpoq.

Mittarfiit tallineqartussat nutaamillu Qaqortumi mittarfiulernissaq ataatsikkut suliarinagit, ataasiakkaarlugit suliarigaanni tamanna sanaartugassanut allanut kinguarsaataassanngitsoq, Sulinermik Inuussutissarsiuteqartut kattuffianni siulittaasup, Jess G. Berthelsenip siunnersuutigaa.

AAMMA ATUARUK Mittarfiit allamiunik sulisoqarluni sanaartorneqassasut

Tamannalu Inuussutissarsiornermut Suliffeqarnermullu naalakkersuisup isumaqatigaa.

- Uanga maani Inuussutissarsiornermut Suliffeqarnermullu naalakkersuisutut pisussaaffigaara maani innuttaasut illersussallugit aallaavigalugit sulinerup ingerlanneqarnissaanut aqqutissiuusseqataanissara. Taanna isumaqarpunga apeqquserneqarsinnaanngitsoq, Hans Enoksen oqarpoq.

Aningaasaqarnermut naalakkersuisup Qanoruumi ippassaq apersorneqarnermini naalakkersuisooqatini isumaqatigalugu oqarpoq imalu nangilluni oqarluni:

AAMMA ATUARUK Mittarfimmut aqqusinniornermut 103 millionit Sermersuup aningaasartuutiginiaraa

- Uani pineqartoq tassaavoq, aningaasaqarnikkut equsoortoqassagaluarpat, tassa annertoorujussuarmik aningaasaliinermi aningaasat kaaviiaartut amerlipiloorpallaarneranni akit innuttaaasunut atugassarititaasut apparujussuassagaluarpata, taassuminnga pinngitsoortitsinissamik siunnersuutaavoq una, aningasaqarnermut naalakkersuisoq, Aqqaluaq B. Egede oqarpoq.

AAMMA ATUARUK Mittarfiit nutaat angallanneq akisunerulersissinnaagaat

AAMMA ATUARUK Tikisitanik isumalluuteqarniarneq navianartuuvoq