Mittarfiit nutaat angallanneq akisunerulersissinnaagaat
Illoqarfinnili allanit ilaasartunut, timmisartuussinerit ikinnerulersinnaapput sivisunerulerlutik, akisunerulerlutillu, Air Greenlandip tamanna oqaatigaa.
- Assersuutigalugu Maniitsumut timmisartuussinermut atatillugu aningaasartuuteqarnerulissaaq. Sisimiunut timmisartornerit sivisussusaat ullumikkornit marloriaammik sivisunerulissapput, Air Greenlandip pisortaanerigallagaa, Jacob Nitter Sørensen oqarpoq.
AAMMA ATUARUK Mittarfiit nutaat angalanernut akisunerulersitsissapput
Angalaneq sivisunerusoq timmisartullu ilaasukinnerusut
Tamanna Maniitsumiit ilaasut Nuummiit aqqusaarneqarlutik ullumikkut Kangerlussualiaanneqartarnerannut attuumassuteqarpoq.
Sisimiunit Kangerlussualiartarneq ullumikkut 20 minutsinik sivisussuseqarpoq, nunanullu allanut mittarfissanukartalissagunik, 50 minutsit atorlugit Nuuliartalissapput.
Mittarfeqarnermik paasiniaaqqissaartartoq, Sydbank naapertorlugu mittarfiit aaqqissuussaanerannik allannguinermi kingunerluuteqarnissaq avaqqunneqarsinnaanngilaq.
- Alloriarneq tamanna akuererusunnerlugu politikkikkut suliarineqassaaq. Kikkut eqqorneqassanerat sumilu ajutoornerpaassanersoq misissuiffigeqqissaassaaq, Sydbankimiit, Jacob Pedersen oqarpoq.
AAMMA ATUARUK Kalaallit Nunaanni mittarferujussuaq ataaseq naammappoq
Air Greenland siunissamut naleqqussassasoq
Air Greenlandili aaqqissuussinernut nutaanut naleqqussaagunik aaqqissuussinerup allanngortinnerani immikkut aningaasartuutissat annikillisarneqarsinnaasut erseqqissarpaa.
- Timmisartuutileqatigiiffiit aqqutigisartagaasa naapittarfiilu allanngorneratigut ilaasussat amerlanerulertarput taamaalilluni timmisartut allaanerusut, tassa pioreersunit anginerusut pisariaqartinneqalissallutik, Jacob Pedersen oqarpoq.
Nunamullu takornariat pilerisaarnerat iluatsinngippat tamanna illoqarfinnut minnerusunut iluaqutaasinnaanera, Jakob Pedersenip akerlilersinnaanngilaa.
Mittarfiit nutaat pilersinnerisigut ilaasartut ilaannut atugassarititaasut ajornerulersinnaapput, amerlanerpaanulli atugassarititaasut pitsaanerulissasut Air Greenlandip pisortaa isumaqarpoq.
- Angalanerit sukkanerusumik, pitsaanerusumik akikinnerusumillu ingerlalissapput, Air Greenlandip pisortaanerigallagaa, Jacob Nitter Sørensen oqarpoq.