Air Greenland: Mittarfiit nutaat angalanernut akisunerulersitsissapput

Nuummi Ilulissanilu mittarfiit tallisat Kalaallit Airportsinut tunniunneqassappata, tamanna Mittarfeqarfinnut sunniuteqarsinnaavoq.

Nunammi mittarfiinik ingerlatsivik taamaallaat mittarfinnik imminut akilersinnaanngitsunik ingerlataqalissaaq.

Taamaattumik aningaasanut inatsisissammi 2018-imeersumi allassimavoq amigartoorutit matussutissaannik aqqiisuteqartariaqartoq.

Akitsuutit qaffannissaat Air Greenlandip annilaangatigaa.

- Apeqqut annertooq tullinnguuttoq tassa akitsuutit qaffasissusissaat. Soorunami mittarfissat aningaasaliisunut pissarsiaqaataallutik niuernerpalaartumik ingerlanneqassasut, Air Greenlandimi pisortaanerugallartoq Jakob Nitter Sørensen oqarpoq.

AAMMA ATUARUK Mittarfiit aningaasartuutaajualissappata akuerisinnaanngilarput

Maannakkut mittarfinni ingerlanneqartuni taamaallaat Ilulissat, Nuuk Kangerlussuarlu sinneqartoorutaasumik ingerlanneqarput, mittarfiit nunap sinneraniittut amigartooruteqartumik ingerlanneqartut.

Imatulli ingerlapput; Ilulissani, Nuummi Kangerlussuarmilu sinneqartoorutit mittarfiit sinnerisa amigartoorutaannik matussusiisarlutik.

Taamatulli ikiorsiissutinik tapiisarnerit siunissami ingerlanneqarsinnaanngillat, taamaattumik akiligassap qanoq aaqqiiffiginissaa pissanganassooq.

Mittarfiit sinneqartoorfiusut Kalaallit Airportsinut nuunneqarpata, amigartoorfiusut qanoq matussuserneqarnissaat aningaasanut inatsisissami qanoq siunnersuusiorfigineqassanersut pissanganarpoq.

Taama pisoqarnissaa naatsorsuutigineqarpoq mittarfiit nutaat sananeqarpata Mittarfeqarfiit akigititassat nutaat ilusilersulerpatigit.

Taamaattumik Jakob Nitter Sørensen isumaqarpoq mittarfiit amigartoorfiusumik ingerlasut akilersornissaannut periarfissat marluusut.

Nunap karsia tapiinngippat mittarfeqarfinnut akitsuutit qaffattariaqassapput.

- Nuup, Ilulissat Qaqortullu avataanni mittarfiit akigititassaat aamma apeqqutaajumaartut, Airgreenlandip pisortaanerigallagaa Jakob Nitter Sørensen oqarpoq.

AAMMA ATUARUK Kalaallit Nunaanni mittarferujussuaq ataaseq naammappoq