Mittarfiit allamiunik sulisoqarluni sanaartorneqassasut

Nuup illoqarfiata inerisarneqarnera nunatsinnilu mittarfinnik tallilerinerit nunanit allaneersunik sulisoqarluni ingerlanneqassapput. Taamaaliornikkut sanaartornermut aningaasartuutit killilersimaarniarneqarput sanaartornerullu iluani sanaartortoqarpallaannginnissaa qulakkeerniarneqarluni.
Assi © : KNR
septembarip 13-at 2017 10:33
Nutserisoq Simon Uldum -

Mittarfinnik nutaanik sanaartornerit Nuullu illoqarfiani sanaartornerit ilarujussuisa nunanit allaneersunik sulisoqarluni ingerlanneqartariaqarnissaat aningaasaqarnermut naalakkersuisup Aqqaluaq B. Egedep (IA) naatsorsuutigaa.
 
Randi Vestergaard Evaldsenip (D) Danmarkimi aningaaserivissuup, Nationalbankip, nunatta aningaasaqarneranik misissueqqissaarisimanera pillugu paragraf 37 naapertorlugu Naalakkersuisunut apeqquteqaataanut akissuteqarluni taama allappoq.

AAMMA ATUARUK Sanaartorujussuarneq akisunaarneqarlunilu kinguaattoorutaasinnaasoq

Danmarkimi aningaaserivissuup sanaartornerup iluani ukiuni aggersuni akunnattoortoqarsinnaanera aggustip qiteqqunnerani mianersoqqussutigaa.

Mittarfinnimmi tallilerinerit ilutigisaanik Nuummi illoqarfimmik inerisaaneq annertooq pissappaa sanaartornerup iluani naammattunik sulisussaqarnissaq ajornartorsiutaalersinnaavoq.

Sanaartornermullu sulisussat naammanngippata, tamanna suliniutinik akisunerulersitsisinnaavoq kinguaattoortitsilluniluunniit, Danmarkimi aningaaserivissuaq taama allappoq.

AAMMA ATUARUK Naalagaaffiup aningaaserivissuata nunatta aningaasaqarnera ernumanartoqartikkaa

Sanaartornerit sanaartornerup iluani suliaqartunik tatisisinnaanerat Aqqaluaq B. Egedep isumaqataaffigaa.
 
Taamaasillunilu nunanut allanut neqoroortitsisoqarsinnaanera Naalakkersuisut naatsorsuutigigaat, akissutimini taama allappoq.

Tamannalu pissutigalugu mittarfinnik sanaartornerit ilarujussui nunanit allaneersunik sulisoqarluni ingerlanneqartussaassasut oqaatigaa.

AAMMA ATUARUK Byggeriet finansieres men driften vil stadig give underskud

- Tamanna ilaatigut siunertaqarpoq, sanaartortoqarpallaalenissap pinngitsoortinniarnissaata, saniatigullu aningaasartuutissat annertussusaasa appasitsinniarnissaannik, Aqqaluaq B. Egede taama allappoq.

Pingaartumillu mittarfiliortitinermut tunngatillugu aningaasartuutissat sapinngisamik appasitsinnissaat pingaaruteqarpoq, tamanna angallannermi akinut sunniuteqartussaassammat.