Danmarkimi oqalutsit kalaallit amigaataasut
Oqalutsissarsiorlutik Aarhusimi Kalaallit Illuutaannut saaffiginnittartut ukiut siuliinut naleqqiullugit amerlanerupput, Kalaallit Illuata pisortaa, Jørn Holbech, KNR-imut taama oqarpoq.
- Aarhusimi Kalaallit Illuutaanni ukiuni marlunngulersuni pisortaavunga, piffissamilu tassani oqalutsissarsiortut amerlatsissimasut takusinnaavara.
Innuttaasut kalaallisut oqaasillit Aarhusip Kommuniani sulisunik ataatsimeeqateqarnerini tamani oqalutseqartinnissaat Kalaallit Illuata isumaginninnermut immikkoortortaqarfiata akeqanngitsumik neqeroorutigisarpaa. Suliassallu amerlaqaat. Ima amerlatigaat Kalaallit Illuani oqalutsit pingasuusut kommunip aqutsiveqarfii piumaffigisariaqartarlugit kalaallit innuttaasut ataatsimeeqatiginissaat katersussagaat.
- Ilaqutariinnut ataasiakkaanut tunngatillugu suliassat amerlivallaaleraangata, oqartariaqartarpugut, 'suliassat ataqatigiissinniassagutsigit qanoq aaqqissuussisinnaavugut'. Ilaanneeriarlutalu aamma itigartitsisariaqartarpugut, pingaartumik sivikitsumik piffissalerlugu saaffiginnittoqaraangat, Jørn Holbech taama oqarpoq.
Aamma atuaruk Nittartagaq nutaaq Danmarkimut nuunneq pillugu paasissutissiiffiussaaq - danskisut
Nuuttut danskit oqaluppiarsinnaanngitsut amerlasut
Aalborgimi Odensemilu Kalaallit Illuutaanni pissutsit aamma taamaapput, Københavnimilu isumaginninnermut immikkoortortaqarfimmi aalajangersimasumik maannakkorpiaq ataasiinnarmik oqalutseqartoqarluni. Narsami sullissinermut atatillugu sulisumik atukkiussisoqarsimaneranik tamanna pissuteqarpoq. Tamatumunnga taarsiullugu Kalaallit Illuat oqalutsinik freelanceusunik arlalinnik pissarsinissaminut periarfissaqarpoq.
John Dalager Isumaginninnermut immikkoortortaqarfimmeersoq naapertorlugu, Københavnimi oqalutsissarsiortarneq ukiuni kingullerni annertunerulersimanersoq nalunarpoq, Nunatsinniilli Danmarkimut nuuttartut amerliartornerat peqatigalugu tamatuma annertusiartornissaa naatsorsuutiginerarpaa.
Aamma atuaruk Danskit ministeriat akuunerulersitsinissamut siunnersuummut qulartoq
Oqalutsinik kalaallinik pissarsiortarnerup annertunerulersimaneranut nassuiaatissaq ataasiinnaavoq. Nunatsinni inunngortut 357-it Danmarkimut siorna nuupput, ukiuni 2010-mit 2015-imut ukiumut agguaqatigiissillugit 150-it 200-llu akornanniittaraluarlutik.
Kalaallilli Danmarkimut nuuttut amerlasuut siornatigumut naleqqiullugit danskisut oqalussinnaannginerusut, Odensemi Kalaallit Illuutaanni akuunerulersitsinermik suliaqartoq, Gorm Vold, oqaluttuarpoq.
- Oqarsinnaavunga qallunaatulluunniit oqalussinnaanngitsut tikittarput, taakkua assigiinnassavaa Kinamut aallarunik imaluunniit allanut. Oqaasii paasisinnaanngiivippaat, qallunaatulluunniit paasisinnaanngillat.
Pingaartumik nunaqarfimmiut illoqarfinniillu mikinerneersut danskit oqaasii ajornartorsiutiginerusarpaat. Aamma naak arlallit danskit oqaasiinik ilinniartinneqarsimagaluarlutik.
- Pappiliatigut takusinnaavarput qallunaatoornikuusut meeqqat atuarfianni, kisianni piviusuuvoq una, qallunaatoorsinnaassusiat 0-imiippoq, suunngitsoq. Amerlaqaat taakkua, Gorm Vold taama oqarpoq.
Aamma atuaruk Aaja: Kalaallit akuunerulersinnissaannut suleriaasissamik pisariaqartitsisoqarpoq
Oqalutsinik pisariaqartitsineq assigiinngitsunik pissuteqarpoq
Kalaallit Danmarkimi innuttaasut oqalutsissamik piniartarnerinut kisitsisinik tamakkiisunik pissarsinissaq ajornakusoorpoq.
Nunap immikkoortuini napparsimmaveqarfiit oqalutsitut sullissivinnik oqalutsinillu freelancenik Kalaallit Illuutaat avaqqullugit aammalu napparsimmavinni sulisunik kalaallisut oqalussinnaasunik atuinerusarput.
Aalborgimi Kalaallit Illuutaanni pisortaq Søren Stach Nielsen isumaqarpoq oqalutsissarsiortarnerup annertusineranut kalaallit Danmarkimiittut pingaartumik ukiumi kingullermi sammineqarnerulersimanerannik aamma pissuteqarsinnaasoq. Taamatuttaarlu kalaallit innuttaasut danskillu oqartussaasuisa oqalutseqarnissamik pisinnaatitaaffeqarneq ilisimaneqarnerulersimavaat.
Tamannalu ilaatigut ajunngitsortaqarsinnaasoq, aammali amerlanerusut danskisut oqalulluarsinnaanatik Danmarkimut nuuttartut 'eqqarsarnartoqartoq' Søren Stach Nielsen isumaqarpoq. Jørn Holbechillu Aarhusimeersup isumaqatigaa. Suliassanimi oqimaatsuni oqalutsimik pisariaqartitsisoqakkajuttarpoq.
- Kisitsisitigut paasissutissat qiviaraanni (oqalutseqartitsinermut tunngasut, aaqq.), suliassat aningaasaqarnermut, suliffissaleqinermut angerlarsimaffeqannginnermullu tunnganerupput.
