Nittartagaq nutaaq Danmarkimut nuunneq pillugu paasissutissiiffiussaaq - danskisut

Nittartagaq Danmarkimut.dk Nunatsinnit Danmarkimut nuunnermi ilisimasariaqakkanik paasissutissiissaaq. Nittartakkalli sunniutissaa aamma ernumanartoqartinneqarpoq.
Assi © : Simon Uldum/KNR
juunip 09-at 2016 07:56
Nutserisoq Simon Uldum -

Kastrupip Timmisartoqarfissuanit qanoq ingerlariaqqittoqartarpa? Sumi inissarsiortoqarsinnaava? Aamma NemID sunaava?

Apeqqutit tamakku allarpassuillu nittartakkami maanna suliarineqartumi danmarkimut.dk-mi ukiaru saqqummersinneqarpat akissutissarsineqarsinnaassapput.

Danmarkimummi nuunnermut atatillugu paasissutissat ataatsimut katersornissaat pisariaqartinneqarpoq, Københavnimi Kalaallit Illuutaanni pisortaq, Leise Johnsen, taama oqaluttuarpoq.

- Misilittakkavut naapertorlugit paasissutissat assigiinngiiaartupilussuit pigineqarput, soorlu kommunini Kalaallillu Illuutaanni. Aamma Namminersorlutik Oqartussat paasissutissat taakku pillugit quppersagaliaqarput. Paasissutissalli assigiissarnissaat matumani pineqarpoq, taamaaliornikkut paasissutissanik ujarleqqaarnissaq pisariaarutissammat.

Kalaallit Illuutaat sisamaasut nittartakkamik suliarinnittuupput, taakkulu Nunatsinnut Danmarkimut nuuttartut Danmarkimi inuulernissamut piareersarsimanatik tikittut amerliartuinnarnerat maluginiarsimavaat.

- Inuit sulinitsinni naapittakkagut maanga nuunnermut tunngatillugu ilisimasaat killeqartupilussuupput . Taamatullu suliniuteqarnitsigut ilisimasaqarnerulernissaat anguniarparput, Leise Johnsen oqarpoq.

Pilerisaarutaasinnaanissaa ernummatigigaat

Københavnilli Kommuniani inooqataanikkut ajornartorsiortut ornittagaanni Café Sundholmimi nittartakkap qanoq sunniuteqarsinnaanera ernumanartoqartinneqarpoq. 

Kalaallit inuusuttuunerusut amerliartuinnartut Nunatsinnut uternissamik pilersaaratik Danmarkimut tikikkaagamik ornittakkamut tassunga pisarput, isumaginninnermi siunnersorti Sannie Langballe taama oqarpoq.

- Inuusuttut (kalaallit, aaqq.) amerliartuinnartut cafémiittartut takusinnaavarput. Amerlanertigullu ikinngutiminni ilisarisimasaminniluunniit piffissami sivisuumi najugaqarsinnarlutik imaluunniit Christianiamiissinnarlutik maanga cafémut pisarput. Ilaat danskiusut oqalussinnaanngingajapput, tamannalu pissutigalugu pisortanit ikiorneqarnissaminnut tunngatillugu ajornakusoortupilussuarmik inissisimasarput uatsinnut pinnginnerminni.

Paasissutissanik taama ittunik katersuilluni nittartagaliortoqarneratigut kalaallit inuusuttut amerlanerusut Danmarkimut nuunnerinik kinguneqarsinnaanera ernumassutigaa.

- Danmarkimut nuunnermut tunngatillugu pissutsit qanoq ittuunerinik paasitinneqarnissaq pitsaalluinnartutut isigaara. Nittartakkalli Danmarkimut nuunnissamut pilerisaarutitut isikkoqarsinnaanera aamma ernumassutigaara, Sannie Langballe oqarpoq.

 

Nittartagaq danskisuunerusoq imaqartinneqassaaq

Danmarkimut.dk-lli Danmarkimut nuunnissamut pilersaarutitut atorneqarnissaa siunertarineqanngilluinnartoq, Leise Johnsen oqarpoq. Paarlattuanimmi sunniuteqarsinnaassasoraa.

Nunatsinni innuttaasut Danmark pillugu paasissutissanik sukumiisumik pissarsisinnaalernerisa saniatigut nittartakkami allaaserisineqartut danskisuujunerussapput. Taamaaliornikkut takutikkumallugu Danmarkimut nuunnermi danskit oqaasiinik atuinissaq piareersimaffigineqartariaqartoq.

- Nittartakkap imarisa danskisuujunerussapput, Danmarkimimi najugaqassagaanni danskit oqaasiinik atuilluarsinnaasariaqarpoq nittartakkamilu allaaserineqartut paasilluarsinnaasariaqarlutik. Nittartagaq danskisut paasiuminartumik imaqartinneqassaaq, Leise Johnsen taama oqarpoq.

Kalaallit Danmarkimiittut inuiaqatigiinni peqataatinneqarnerisa pitsanngorsarnissaannut Kalaallit Illuutaannut aningaasaliissutaasunit 8 millionit koruuniusunit nittartakkap suliarineqarnera aningaasalersugaavoq, pilersaarutillu malillugit ukiaru atuutilersinneqassalluni.