Jette Bangip filmiliaa New Yorkimi takutinneqalersoq
Jette Bangip filmiliaa "Inuit" Avannaani Savissiviup eqqaani Kap Yorkimit Qimusseriarsuup tungaanut 1938-mi angalanermini filmiliaa
Nunat avannarliit illuutaanni Scandinavian Housemi takutinneqassaaq.
Filmi takutinneqareerpat Københavnimi Kalaallit Illuutaanni pisortap Leise Johnsenip Bangip suliai Nunattalu ineriartornera oqaluttuarissavai.
Filmi Inuit assigiinngitsorpassuartigut immikkuullarissuteqarpoq. Nunatsinni qalipaatilimmik filmiliat siulliit ilagivaat, inooriaatsimillu aammalu ileqqutoqqanik ukiualuit qaangiunnerini takussaajunnaartunik takutitsisuulluni.
AAMMA ATUARUK Jette Bangip inuunera sulineralu pillugit atuagaq nutaaq
Inuunermi sinnerani Nunarput tiguartiffigaa
Assiliisartoq Danmarkimeersoq Jette Bang, 22-nik ukioqarluni Nunatsinnut angalaqqaarpoq, ulluinnarni inuunermi pisartunik assiliiartorluni. Inuunermi sinnerani Nunarput tiguartiffigaa arlaleriaqaluni Nunatsinnukartarluni tuusinterpassuarnillu assilisaqarluni.
- Jette Bangip assinik katersarpassui nuannersut Kalaallit Nunaata oqaluttuarisaanerata pingaarutillip oqaluttuarinissaanut atugassaqqilluinnartuupput. Assilisai atorlugit oqaluttuarnissaq nuannertuaannarpoq, Leise Johnsen tusagassiorfinnut nalunaaruteqarluni taama allappoq.
Leise Johnsen Københavnimi Kalaallit Illuutaanni pisortaanermi saniatigut assinik atuakkiamik "Jette Bang - Nannup naavata nalaanit' siorna saqqummersoq atuakkiaraa.
Filmi Inuit oktobarip 26-ani nal. 18.30 takutinneqassaaq.