Isumaqatigiinniarnerit ingerlanneqaraluartut Aleqa Folketingimi najuutinngilaq

Folketingimi isumaqatigiinniarnerit Kalaallit Nunaannut pingaaruteqarluartut pissami matumani ingerlanneqartaraluarput.

Christiansborgimili attaviitsup Aleqa Hammondip allaffia parnaaqqavoq. Politikeri Nuummiippoq, oktoparillu 27-iannili tamaaniissimalluni. Taamaattumik ministerit marluk isumaqatigiinniarnernut aggeqqusissutaannut nammineq najuussinnaanngilaq.

Illersornissamut ministeri Claus Hjort Frederiksen sapaatit akunnerata siuliani kunngeqarfiup illersorneqarnissaanut ukiuni tallimani atuuttussamik isumaqatigiinniarpoq; isumaqatigiinniutinut illersornissaqarfiup Issittumi suliassai ilaallutik.

AAMMA ATUARUK Nunarput ullormut oqaluuserisassani aallaqqaataaniit

Aleqa Hammondip Christiansborgimi allaffianit tusagassiuutinut nalunaarummi sapaatip akunnerata siuliani sisamanngornermeersumi Hjort nalunaaruteqarsimavoq Illersornissaqarfiup Issittumi suliassai pillugit ministerip ulloq taanna kalaallit folketingimut ilaasortat oqaloqatigerusukkai.

Illersornissamut isumaqatigiissutissap ingerlannerata taamaalinerani aatsaavissuaq Folketingimi ilaasortat Atlantikup avannaaneersut isumasiorneqarput.

Illersornissaqarfik nalunaarpoq Aleqa Hammond novembarip qulinganni ataatsimeeqatigineqassasoq - tassa Claus Hjort Frederiksenip ataatsimiigiaqqusineranit sapaatip akunneri marluk qaangiuttut.

Ministereqarfik naapertorlugu ilaasortat Atlantikup avannaaneersut tamarmik illersornissamut isumaqatigiinniarnermut aggersarneqarsimapput, Aleqa Hammondili ullormik ataatsimiiffissamik nassaarniartariaqarsimasoq.

AAMMA ATUARUK Aleqa Folketingimut ukioq kingulleq aamma taamaatitsiinnarpoq

Partiit politikerillu Claus Hjort Frederiksenip sapaatit akunnerini kingullerni marlunni, uanilu ataatsimeeqatigissagai ministereqarfik nalunaarpoq, taamalu Aleqa Hammond kingullerpaanut ilaassaaq.

Ilaasortat Atlantikup avannaaneersut illersornissamut isumaqatigiissusiortunut toqqaannartumik ilaanngillat; taakkumi tassaapput Folketingimi isumaqatigiissummik amerlanerussuseqartut.

Inatsisinik atuutsitsinermut ministeri oqarasuaatikkut ataatsimeeqatigigaa

Ministeri alla Søren Pape Poulsen, inatsisinik atuutsitsinermut ministereqarfimmi, Pinerluttunik isumaginnittoqarfimmut tunngasut - aamma Kalaallit Nunaannut tunngasut - isumaqatigiinniutigai.

Isumaqatigiissummi tassani Nuummi isertitsivittaassami matoqqasortalimmi atugassarititaasussat eqqartukkanut ilaassapput. Ataatsimiinnermi tassani Aleqa Hammond aamma nammineq najuutissanngilaq.

Taarsiullugu Hammondip Søren Pape oqarasuaatikkut pingasunngornermi ataatsimeeqatigisimanerarpaa.

Isertitsivinni pineqaatissinneqarsimasunut isumaginnittut pitsaanerusumik ilinniartinneqartarnissaat Hammondip eqqartorsimavai, taassumalu saniatigut kissaatigisimallugu sapinngisamik kalaallit amerlasuut Nuummi pineqaatissinneqarsimasunut inissiisarfissaq 2019-imi atulerpat atorfinitsinneqarnissaat.

Attaviitsoq aperineqarami sooq Folketingimi isumaqatigiinniarfinni najuutinnginnersoq akivoq:

- Uanga nunatsinni najugaqarpunga, Danmarkimi najugaqanngilanga. Aammalu  ataatsimiinnissat sapinngisamik oqarasuaatikkut imaluunniit Skypekkut arlaanni periarfissaqartillunga atorluartarpakka. Aamma illuatungeriilluni kissaatigineqartillugu timmisartortarpunga. Taanna arlaannaalluunniit tamaat ammaffigisuaannarpara, Hammond KNR-imut oqarpoq.

Taanna isumaqarnerpoq aamma politikkikkut sunniuteqarniaraanni nammineq najuuttariaqanngitsoq.

- Pingaarnerpaavoq una: Oqariartuutitta tusarneqarnerat aammalu oqariartuutitta sunniuteqarnerat - aamma atortorissaarutit atorlugit - ajunngitsutut nalilerusuppara, taanna oqarpoq.

Folketingimi najuutinngikulaneq

Ministeriunerup Lars Løkke Rasmussenip maajip qaammataani ukioq manna  tusangiasaarerpaluttumik oqaatigaa Hammondip - Kalaallit Nunaat pillugu ataatsimiititaliami siulittaasutut najuussimannginnera - ataatsimiititaliap Pituffik aamma Camp Century  matoqqasumik ataatsimiissutigimmagit.

AAMMA ATUARUK Aleqa Hammond ataatsimiinnernut pingaarutilinnut peqataanngitsoq

Taamanikkut Hammondip Danmarkimut billetissaqannginnini utaqqatsissutigaa; tamannali Air Greenlandip KNR-imut eqqunnginnerarpaa.

Aammattaaq Inuit Ataqatigiit folketingimut ilaasortaatitaata Aaja Chemnitz Larsenip Hammondip Christiansborgimi najuutinngitsuukulanera pillugu isornartorsiorsimavaa. Pineqartorli oqaaseqarfigerusunngilaa, naliginnaasumilli kalaallit Folketingimiittut pillugit ima oqarluni:

AAMMA ATUARUK Aajap suleqatimi peqataasannginnera uggoraa

- Qinersisartummi kalaallit assigiinngitsut sinniisoraatigut. Uanga qinersisima soqutigisai aalluppakka, Kalaallit Nunaat sinnerlugu aamma kissaatigissagaluarpara siammasinnerusumik sinniisoqarnissaa.

Folketingimut ilaasortap Inuit Ataqatigiinneersup Aaja Chemnitz Larsenip illersornissamut ministeri aamma inatsisinik atuutitsinermut ministeri illersornissamut isumaqatigiissut aamma pinerluttunik isumaqatigiissaq pillugu marlunngornermi sapaatip akunnerata siuliani marlunngornermi ataatsimeeqatigai.

KNR-ip paasitinneqarnera naapertorlugu Aleqa Hammond Købwnhavnimut ullumi ataasinngornermi tikissaaq.