Aleqa Folketingimut ukioq kingulleq aamma taamaatitsiinnarpoq
Aleqa Hammondip Folketingimi sulissaraluani aatsaat siullermeerluni taamaatiinnanngilaa. Ukioq kingulleq marsip qaammataani ataatsimiinnissat pingaaruteqartut peqataaffiginiarnagit aamma aalajangernikuuaa.
Tassani Atlantikup avannarpasissuanit piginnaatitaasut ministeriunermut apeqquteqarsinnaaneranni peqataanngilaq. Tamanna ukiumut sisamariaannarlutik pisinnaatitaaffigaat.
Tamatuma aqaguani Kalaallit Nunaannut ataatsimiititaliap Pituffimmut tunngatillugu isumasioqatigiinninniarluni nunanut allanut tunngasunut ministerimik qaaqqusinerani aamma peqataanngilaq.
AAMMA ATUARUK Aleqa Hammond Folketingimi najuutinngitsoq
Aleqa Hammondip ukioq kingulleq peqataannginneranut februaarip naanerani Nunatsinnukarnera peqqutaavoq, tassanilu Nuummi innuttaasunut Folketingimi sulinini pillugu ataatsimiititsivoq, kiisalu Arctic Winter Gamesertoqarnerata nalaani tikeraartutut najuulluni.
Aleqa Hammond peqataannginninni pillugu apersorneqarusussimanngilaq, KNR-imullu mailikkut allappoq, Nuummi innuttaasunik ataatsimiititsigami kingornalu Maniitsumut, Sisimiunut, Aasiannut, Ilulissanut Uummannamullu innuttaasunik ataatsimiitsitsiartortussaalluni.
Innuuttaasunut ataatsimiititsinissani qangalili pilersaarutigisimallugit, pingaarnerutitsinerillu nammineq pingaarnerutitaralugit, Aleqa Hammond e-mailikkut allappoq.
Maniitsumi, Sisimiuni, Aasianni, Ilulissani Uummannamilu innuttaasunut ataatsimiititsinerit Folketingimut ilaasortap nammineerluni aaqqissuussarai, Folketingimilu ataatsimiinnerit inerneqarneranit ullut 16-it qaangiunneranni aatsaat aallartinneqarput.