Folketingip ukiua: Nunarput ullormut oqaluuserisassani aallaqqaataaniit
Folketingip politikkip ukiua 2017/2018 pisortatigoortumik marlunngorpat ammassavaa.
Tamanna – Inatsit tunngaviusuni – allassimasoq malillugu oktobarimi marlunngorneq siulleq nal. 12 pisarpoq, tassanilu Folketingimi sivisunerpaamik ilaasortaasimasoq tikilluaqqusissaaq. Ministeriunerlu, Lars Løkke Rasmussen ammarneqarnerani oqalugiassalluni.
Tamatumali kingorna sullisit toqqaannartumik atineqassapput.
Tassalu ammaanersiornerup aqaguani, pingasunngornermi Kalaallit Nunaannut ataatsimiititaliami nunatsinni immap assingisa digitaliusut sananeqarneri pillugit ammasumik isumasioqatigiittoqassaaq. Tassani danskit nukissiuteqarnermut, pilersuinermut silallu pissusianut ministeriata, Lars Christian Lilleholtip Geodatastyrelsep nunatsinni immap assingi katillugit 32-usut suliarineranik kinguaattooqqangaatsiarnera sumut killinnersoq paasissutissiissutigissavaa.
Danskit naalakkersuisuisa maannamut nalunaarutigikuuaat immap assingisa qaqugu piareerneqassaneri 2018-imi aatsaat ullulerneqarsinnaassasoq.
AAMMA ATUARUK Saammarsaatissamik imaqarpianngitsumillu isumaqatigiissuteqartut
Isumaqatigiinniarnerit nunatsinnut pingaaruteqartut
Nunatsinnit isigalugu isumasioqatigiinnerit pingaarnerusut sapaatit akunneri ikittuinnaat qaangiuppata aallartissapput.
Illersornissamut ministerip, Claus Hjort Frederiksenip danskit naalakkersuisut Illersornissaqarfiup aaqqissuunneranut aningaasaqarneranullu ukiunut sisamanut isumaqatigiissutaat nutaaq immaqa sapaatip akunnerani matumani saqqummiutissavaa.
Danskit naalakkersuisuisa ilisimanarsisereerpaat Illersornissaqarfik aningaasaqarnerussasoq. Naalakkersuisulli Issittumi nakkutiginninneq, ilinniagaqarneq, Issittumilu imaani annaassiniarneq ullumikkornit qaffasinnerutinniarneraa suli nalunarpoq.
Isumasioqatigiinniarnerit partiit pioreersut, 2013-imiit 2017-imut illersornissamut isumaqatigiissummik suliaqartut akornanni pissaaq. Nunanit avannarlernit folketingimut ilaasortat arlaannaalluunniit ilaanngilaq, aamma Alternativet Enhedslistenilu peqataanngillat.
AAMMA ATUARUK Illersornissaqarfiup issittumi suliassai pillugit nalunaarusiaq saqqummiunneqartoq
AAMMA ATUARUK IA vil have flere grønlændere i Forsvaret og færre besparelser
Ukiaq manna isumasioqatigiinniarnissarujussuit aappaat danskit 2018-imut aningaasaqarnermut inatsisissaannut tunngavoq. Naalakkersuisut siunnersuutaanni nunatsinnut allannguutaani annerpaat tassaavoq nunatsinni eqqartuussiveqarnermut ukiuni sisamani immikkut 10 mio. koruuninik immikkoortitsimmat.
Folketingimi ilaasortap, Aaja Chemnitz Larsenip Inuit Ataqatigiinneersup aningaasat naammassanersut ernumasartoqartinnerareerpaa. Tamatumanilu attaviitsoq, Aleqa Hammond peqatigalugu danskit aappaagumut aningaasanut inatsisissaat oqallisiginneqataaffigaat.
Pituffik suli eqqartorneqartuarsinnartoq
Sulialli ilaat ukiumi aggersumi aamma uteqqinneqassapput – pingaartumik USA-p Pituffimmiinnerata oqallisigineqarnera.
Danskit nunanut allanut tunngasunut minsteriat, Anders Samuelsen Namminersorlutik Oqartussat danskillu naalakkersuisui USA-p naalakkersuisuinit annikitsumik ilisimatitsissutigineqarsimannguatsiartoq tassa sakkutooqarfimmi radarimik nutarterinermi suliaq pillugu Kalaallit Nunaannut ataatsimiititaliami matoqqasumik isumasioqatigiinnissamut qaaqqusivoq. Tassani Namminersorlutik Oqartussat danskillu naalakkersuisut
AAMMA ATUARUK Pituffik pillugu suli oqaloqatigiittoqarpoq
Tamatuma saniatigut Pituffimmi kiffartuussinissamut isumaqatigiissummi nutaami atugassarititaasut pillugu erseqqissaaneq suli amigaataavoq. Nunatta, Danmarkip USA-llu akorninni isumaqatigiinniarnerit ukiuni marlunni amerlanerusuni ingerlanneqarput nutaartaqaratillu.
Kalaallinut pineqaatissinneqarsimasunut ilagiillu siunnersuisuinut malittarisassat
Innuttaasut sullinneqarneranut sammisani Danmarkimi kalaallit ilagiit siunnersuisuinik pilersitsinissap Danmarkimilu palasimik allamik saniatigut pilersitsinissap politikkikkut oqallisigineqarnissaat tullinnguupput.
Suliaq danskit oqaluffeqarnermut ministeriisa assigiinngitsut nerriviiniissimavoq naammassineqassanili.
Kiisalu Folketingimi ukiumi aggersumi kalaallit pineqaatissinneqarsimasut Herstedvesterimiittut Nuummi parnaarussivittaassamut nuutsinneqarnissaannut malittarisassat sammineqassapput.
AAMMA ATUARUK Byggeriet af anstalten forsinket igen
