Aajap suleqatimi peqataasannginnera uggoraa

Nunatsinniit Folketingimut ilaasortap aaffaa ataatsimiinnernut takkuttannginnera Aaja Chemnitz Larsenip Inuit Ataqatigiinniit Folketingimut ilaasortap uggornarnerarpaa.
Assi © : KNR
marsip 05-at 2017 17:34

- Nunarput Folketingimi 179-inik ilaasortaqartumi marlunnik ilaasortaatitaqarsinnaavoq. Taamaammat Folketingimi ilaasortatut Nunarput ullormut oqaluuserisassaniitsinniarlugu suliniuteqangaatsiarnissarput pingaaruteqangaatsiarpoq, Aaja Chemnitz Larsen oqarpoq.

Aleqa Hammond peqataanngeqqittoq

Aleqa Hammondip Kalaallit Nunaannut ataatsimiititaliami sapaatip akunnerani uani peqataannginneratigut Aaja taama oqaaseqarpoq. Hammondip Kalaallit Nunaannut ataatsimiititaliami aatsaat peqataanngitsuunngilaq. Innuttaasunut ataatsimiinnissanik Arctic Winter Gamesimillu pingaartitsinerunini peqqutigalugu ukioq kingulleq aamma peqataanngilaq.

Folketingimi ulapputtoqarmat, Aaja Chemnitz Larsenip ataatsimiinnerni kisimiittarnini uggoraa.

- Taamaammat nipi ersarissuusussatut isumaqarfigisara marlunnit pinnani ataasiinnarmit saqqumminneqarmat Nunatsinnut soorunami ugguarnarpoq, Aaja Chemnitz Larsen oqarpoq.