Ilulissani qaleralikillinera aalisarnermi malunniuteqaqisoq
- Akisunerusunik nioqqutissaatitsinnik pisiniarniarneri kigaallattarput taavalu pisiariniarneri oqimaattorsiutiginerusarpaat. Ilulissani aalisarnermi atortussanik nioqqutaarniarfimmi Tankeeqqami pisiniartitsisoq Pavia Filemonsen taama oqarpoq.
Tassami Ilulissani Qeqertarsuullu Tunuata sinnerani qaleralinniarneq aasaq manna ingerlalluanngilaq.
AAMMA ATUARUK Akitsuutit nutaat aalisarnerup iluani akissaqartinneqarput
Sinerissap qanittuani umiatsiaararsorlutik Ilulissani aalisartut ukiumut pisassiissutinit 4100 tonsiusunit 2687 tonsiinnaat novembari tikillugu tunisimagaat, Kalaallit Nunaanni Aalisarsinnaanermut Akuersissutinik Nakkutilliisoqarfiup, KANUAANA-p, kisitsisaataasa takutippaat.
Qaleralikinnera ajornartorsiortitsisoq
Qeqertarsuup Tunuani aalisarnerliorneq tamaani aalisartut aningaasaqarnerannut kingunerluppoq. Tamannalu Ilulissani aalisarnermi atortussanik nioqqutaarniarfimmut aamma sunniuteqarpoq:
- Qaleralinniarneq annikilleriarnera malugingaatsiarparput tunisagut ikileriarmata. Soorlu pisiarineqartartut GPS-it nutaanillu umiatsiartaartut atorsinnaasaat allat tamakkua malunnartumik unikaallapput, Pavia Filemonsen oqarpoq.
Aalisartoq Otto Jørgensen Tankeeqqap eqqaani aamma naapipparput. Taanna aamma naapertorlugu maanna qaleralikeqaaq.
Kisianni qalerallit ukiup ilaanni ikinnerusarlutillu ilaanni amerlanerusartut, aalisartup oqaatigaa.
AAMMA ATUARUK Aalisakkat pissutigalugit avammut tunisakinnerusugut
AAMMA ATUARUK Grønlandsbanken aatsaat taama angusarissaartigissagunartoq
Aalisartut qaleralinniat aningaasarsiornikkut ajornartorsiortut Grønlandsbankenip maluginiarsimagaa, pisortap oqaatigereerpaa:
- Angallatiniit mikisuniit qaleralinniat akilersuisinnaassuseqarnermikkut ajornartorsiuteqaleriartortut takusinnaavarput, Martin Kviesgaard oqarpoq.
Avannarpartertut
Qeqertarsuup Tunuani Ilulissanilu qaleralikinnerunera pissutigalugu aalisartut Ilulissaneersut Uummannap eqqaani qaleralinniartut aasaq manna amerlanerusut, Uummannami aalisariutaatilik, Karl Markussen, oqaluttuarpoq:
- Upernaarli maluginiarnikuuarput, tassa aalisarnerup aallartinnerata kingorna, Qeqertarsuup Tunuaninngaanniit aalisariat maani malunnartut.
- Malugigatsigu Qeqertarsuup Tunuani qaleraleqassuseq innarlerneqarsimasutut isikkulik, kisianni aalisartut tikilluaqqunaqaat, Uummannami aalisariutaatilik Karl Markussen oqarpoq.
