Aalisakkat pissutigalugit avammut tunisakinnerusugut

Naatsorsueqqissaartarfimmit kisitsisit nutaat naapertorlugit, avammut niuernermit isertitat siorna ukiup affaata siullianut sanilliullugu 246 millionit koruuninik tassa 16 procentimik apparput.

Nioqqutissanilli eqqussinermut aningaasartuutit aamma apparput, taamaakkaluartorli 106 millionit koruuniinnarmik apparlutik, taamaammat tamanna niuernermi oqimaaqatigiissusermi katillugit 140 millionit koruuninik nikinngassuseqartitsivoq. Niuernermi oqimaaqatigiissutsimi ukiup affaata siulliani amigartoorutit 633 millionit koruuniupput. Taamaakkaluartorli 2015-imi 2014-imilu amigartoorutaasunit tamanna annikinneruvoq.

Naatsorsueqqissaartarfik naapertorlugu, raajat qalerallillu avammut niuerutigineqarnerisa nalingisa apparnerat niuernermi oqimaaqatigiissutsimi nikingasoqalerneranik kinguneqarpoq.

Raajanik avammut niuernermi isertitat 124 millionit koruuninik, qaleralinnillu niuernermik siornamut sanilliullugit 118 millionit koruuninik apparlutik.

Naatsorsueqqissaartarfiup kisitsisaatai misissorluaraanni qalerallit avammut nioqqutiginerat 4.000 tonsimik ikilisimasut takuneqarsinnaavoq.

Qeqertarsuup Tunuani qalerallit amerlassusaat affaannanngorsimanerat pissutigalugu qaleralinniarneq aasaq eqqartugaangaatsiarpoq. Sumiiffimmi tassani aalisarluartoqannginnera aningaasaqarnermut kingunerlungaatsiarpoq.

Pinngortitaleriffiup misissuinerisa takutippaat, uumassusilerisut innersuussutaat qaangerlugu ukiuni kingullerni aalisapiluttoqarnera tamatumani peqqutaasoq. Tamanna aalisartut piniartullu kattuffiata KNAPK-p isumaqatigiaa.

Aalisarnermulli naalakkersup qalerallit tammarneranut silap pissusiata allanngoriartornera peqqutaasoraa.))

Raajalli avammut nioqquteqarnerat 1900 tonsimik tassa 8 procentimik apparpoq.