Grønlandsbanken aatsaat taama angusarissaartigissagunartoq
Akileraarutit ilanngaatiginagit 103,8 millionit koruunik sinneqartooruteqarpoq, siorna 2016-imi piffissap taamaalineranut naleqqiullugu 23 millionit koruuninik pitsaanerulluni.
Grønlandsbanken ernianit akiliutiniillu isertitaqarnerulersimavoq, aningaasat attartortitat amerlisimanerat matumani pissutaalluni.
Aningaasat 3,2 milliardit koruunit attartortinneqarsimapput, siornamut naleqqiullugu 166 millionit koruuninik amerlanerusimallutik..
AAMMA ATUARUK Grønlandsbanken 50-iliivoq
Grønlandsbankenip pisortaata Martin Kviesgaardip kvartalit pingajuanni angusat iluarisimaarpai:
- Immikkoortuni tamani qaffariaateqarpugut, inuussutissarsiornerup siuariartorneranut inuttaasullu atuinerulersimanerannut tamanna takussutissaavoq, Kalaallit Nunaanni isumalluartoqarnerulerpoq, sulisuttali ulappulluarsimaneranut aamma takussutissaavoq, Martin Kviesgaard oqarpoq.
AAMMA ATUARUK Grønlandsbankip naatsorsuutigissaarneq nuannaarutigigaa
Aningaasartuutit aamma qaffassimapput, isertitanulli naleqqiullugu malunnaatilimmik annikinnerusimallutik. Aningaaseriviup ukiunik 50-inngortorsiornissaa aningaasartuutit amerlisimanerannut ilaatigut pissutaapput, soorlu aamma nalikilliliinerit matumani pissutaaqataasut:
- Aningaasanik attartortitsinermi annaasat suli annertussusileruminaapput. Angallatiniillu mikisuniit qaleralinniat akilersuisinnaassuseqarnermikkut ajornartorsiuteqaleriartortut takusinnaavarput, Martin Kviesgaard oqarpoq.
Ukiumut qaangiutilersumut missingersuutitigut angusatik ilimagisamit pitsaanerunissaat, Grønlandsbankenip ukioq manna siusinnerusukkut nalunaarutigaa, soorlu aamma aningaaseriviup pisortaanerata ilimagigaa sulisut amerliumaartut.
AAMMA ATUARUK Naalagaaffiup aningaaserivissuata nunatta aningaasaqarnera ernumanartoqartikkaa