Grønlandsbankip naatsorsuutigissaarneq nuannaarutigigaa
Bankip 2017-imi ukiup affaani sinneqartoorutai 73,8 millionit koruuniupput. Ukioq kingulleq piffissaq taamaalisoq sinneqartoorutit 47,7 millionit koruuniupput.
Inernerit taama kusanartigisut bankimut atortartut amerlinerannik ilaatigut peqquteqarpoq. Tamanna ukioq kingullermut sanilliullugu 9,1 procentimik qaffariarneruvoq. Pisortap, Martin Kviesgaardip angusat nuannaarutigai:
- Naammagisimaarnaqaaq sullissatta amerliartortuarnerat. Tassanilu tunngaviupput sullissat privatiusut inuussutissiornermillu ingerlataqartuusut, Nuummi sinerissamilu.
- Sulisugut ulapinnikooqaat, taamallu tunngaveqarnerup kisitsisit naqqanni erseqqissumik angusanik takutitsipput, aningaaserivimmi pisortaq Martin Kviesgaard oqarpoq.
Taamaalilluni 2017-imut naatsorsuutigisat qaffapput, Martin Kviesgaarip bankip sinneqartoorutissatut angujumaagassaatut naatsorsuutigisimasat 125-145 millionininngaanniit 135-145 millionit koruuninut naatsorsuutigilerpai.
- Naak sinerissamut qanittumi saarullinnianeq qaleralinniarnerlu akunnattuunganartoqarsinnaagalu-artut, taava raajarniarneq patajaatsumik ingerlasutut isikkoqarpoq, soorluli aamma takornariartitsineq kiisalu sanaartorlunilu illuliortitsinerit aamma pitsaasumik ingerlasutut isikkoqartut, Martin Kviesgaard naggasiilluni oqarpoq.