Naalakkersuisut: Akitsuutit nutaat aalisarnerup iluani akissaqartinneqarput
Naalakkersuisut pisuussutinut akitsuutinik nutaanik eqqusinikkut aalisarnerup iluani akitsuutinik qaffaanissamik siunnersuuteqarnerat aalisarnermik inuussutissarsiuteqartunit isornartorsiorneqartupilussuuvoq.
- Akitsuummik taama angitigisumik akiliissagutta atugassarititaasut pitsaanerpaajusariaqarput, maannakkullu taamaanngillat, Sulisitsisut peqatigiiffiata GE-p aalisarnermut avammullu nioqquteqarnermut ataatsimiititaliaani siulittaasoq, Henrik Leth, ilaatigut taama oqarpoq.
Pingaartumik qaleralinnik avammut nioqquteqarnermi akitsuutit qaffasinnerulissapput, Naalakkersuisulli naliliipput akitsuutit nutaat qaleralinniarnerup iluani aningaasaqarnikkut nammanneqarsinnaassasut:
- Akit ullumikkut qaffakkiartulaarput, Naalakkersuisuillu naliliipput avataasiorluni qaleralinniarnerup akitsuummik qaffaanneq nammassinnaassagaa, aningaasaqarnermut naalakkersuisoq Aqqaluaq B. Egede Inatsisartut aningaasaqarnermut akileraartarnermullu ataatsimiititaliaanut akissuteqarluni taama allappoq.
Ataatsimiititaliaq ernumassuteqartoq
Ataatsimiititaliap akitsuutinik nutaanik suliaqarnerminut atatillugu Aqqaluaq B. Egede isumasioqatigisimavaa. Aalisarnermik inuussutissarsiuteqartut Savalimmiunut Islandimiullu naleqqiullugit akitsuutinik pingasoriaammik qaffasinnerusunik akiliisareermata akitsuutinik qaffaaniarneq ataatsimiititaliap ernumanartoqartippaa.
AAMMA ATUARUK Snak om brandbeskatning er ikke på sin plads
Aningaasaqarnermut akileraartarnermullu ataatsimiititaliamit apeqqutigineqartoq alla taassaavoq akitsuutit qaffannissaannik kissaateqarnerup aalisarnerlu pillugu inatsisissatut siunnersuutip nutaap qanoq ataqatigiitsiginersut. Tamannami aalisarnermik inuussutissarsiornerup iluani aamma ernumanartoqartinneqartupilussuuvoq.
AAMMA ATUARUK Aalisarnermi akitsuutit nutaat isornartorsiorujussuarneqartut
Aqqaluaq B. Egede tamatumunnga akissuteqarluni allappoq akitsuutit nutaat 2018-imi januaarip aallaqqaataani atuutilersinneqassasut, aalisarnerlu pillugu inatsit nutaaq ukiumik ataatsimik kingusinnerusumik atuutilertussaasoq. Aalisarneq pillugu inatsisissatut siunnersuutip Inatsisartuni suliarineqarnera suli naammassinngilaq, taamaammat akitsuutit nutaat suliarineqarnerini aalisarneq pillugu nutaamik inatsiseqalernissaa eqqarsaatigineqarsinnaasimanngilaq.
Akitsuutit nutaat iluaqutissartaqartut
Egedeli aamma isumaqarpoq aalisarneq pillugu nutaamik inatsiseqalerpat akitsuutit nutaat iluaqutaajumaartut:
- Pisuussutinut akitsuusersueriaasissatut siunnersuutigineqartoq nikerartuuvoq, taamaanneratigullu aalisarnermi aningaasatigut isertitat nikerarnerat apeqqutaatinneqassallutik. Akit appasippata, taava aamma akitsuut appasinnerussaaq. Pisuussutinut akitsuusiineq nutaaq taamaalilluni aalisarneq pillugu inatsisissamut nutaamut tunngavisseereerpoq, Aqqaluaq B. Egede aningaasaqarnermut akileraartarnermullu ataatsimiititaliamut taama allappoq.
