Aalisarnermi akitsuutit nutaat isornartorsiorujussuarneqartut
Naalakkersuisut Nunatta Karsiata aalisarnermit isertitaqarnerulernissaa qulakkeerusukkamikku, aalisarnermi akitsuusersueriaatsimik nutaamik siunnersuuteqarput.
300 millionit koruunit aalisarnermit ukioq manna isertinneqartussatut missingersuutigineqartut qaavatigut akitsuusersueriaatsikkut nutaakkut 50 millionit koruuninik 2018-imi isertinneqarnissaat naatsorsuutigineqarpoq.
AAMMA ATUARUK Politikkikkut siunertarineqartoq aningaasanit pingaarnerusoq
Aalisarnermiilli akitsuutitigut akileraarutitigullu isertitaqarneruniaatigaluni aalisarnermi pissutsinik ajornerulersitsiniaraanni iluaqutaanavianngitsoq, inuussutissarsiortut isornartorsiuipput.
Leth: Iluanaarutigut ikiliitigalutik akiliinerusassaagut
Aalisartut tunisaqarnerminni akiusup procentiata ilaanik akitsuutitigut akiliisarnissaat siunnersuummi qitiuvoq.
Sulisitsisullu Peqatigiiffiani aalisarnernik nunanullu allanut tuniniaanermik inuussutissarsiuteqartut siulittaasuata, Henrik Lethip siunnersuut iluarinngilaa.
- Akiliinerusalertussaassaagut, ikinnernilli iluanaaruteqartalernissarput aalisarnermut politikkikkut isumagaat. Tassalu akiliutigisinnaasavut ikiliartuinnarput, Henrik Leth, Polar Seafoodip siulersuisuini aamma siulittaasuusoq, oqarpoq.
AAMMA ATUARUK Sanngiinnerit aalisarnermut inatsisissamit eqqugaasinnaasut
AAMMA ATUARUK Aalisarnermut inatsisissap kinguartinnissaa IA-kkut ammaffigaat
Taanna isumaqarpoq, Naalakkersuisut aalisarnermit iluanaarutit ikilisinniaatigalugit akileraarutinik akitsuutinillu qaffaaniarnerat imminut assortortoq.
- Akitsuutitigut akileerujussuartassagutta, taava pitsaanerpaamik atugaqartariaqarpugut. Taamaattoqanngilarlu, Henrik Leth oqarpoq.
Akitsuutit aalisarnermut inatsisissatut siunnersuummut akerliusoq
Naalakkersuisut avataasiorluni aalisarnermi pisassiissutit 10 procentiisa tamanut neqeroorutigineqarnisaannik ukioq manna aalajangertut, Henrik Lethip ilaatigut innersuussutigaa.
- Pisassiissutisiatta 10 procentii tigugaanni assigiinnarpaa, sinneqartoorutit procentinngorlugit 20-t 30-llu akornanni tigugaanni. Aalisakkammi kiilut kingulliit iluanaarutigisarpagut, Henrik Leth oqarpoq.
Tamatumalu saniatigut Naalakkersuisut aalisarneq pillugu inatsisissatut siunnersuutaat ilanngullugu eqqarsaatigigaanni pissutsit ajorneruliinnartut, Henrik Leth isumaqarpoq.
AAMMA ATUARUK Siunnersuut akisussaassuseqanngitsuliorneruvoq
- Inuiaqatigiinnut annaasaqaataasorujussuussaaq, kisianni aamma umiarsuaatileqatigiiffinnut annaasaqaataassaaq. Taamaammat akitsuutit piniarneqartut pineqassanngillat. Aningaasaqarnermut naalakkersuisoq aalisarnermullu naalakkersuisoq suna piumanerlugu oqaloqatigiittariaqarput. Aningaasanik perusuppugut, imaluunniit sunaana piniaripput? Henrik Leth aperivoq.
Aalisarneq pillugu inatsimmi aalisarnermi piginninnermik pisassiissutinillu siammarteriniarneq piviusunngorpat, nunatta karsiata akitsuutinit isertitassai ikinnerussagunartut, siunnersuutip nassuiaatitaani allaqqavoq.
Inatsisartut aalisarnermi akitsuutinut nutaanut siunnersuut marlunngornermi novembarip ulluisa arfineq-aappaanni aappassaaneerlugu oqaluuserissavaat. Siunnersuutip akuersissutigineqarnissaa aningaasaqarnermut akileraartarnermullu ataatsimiititaliap inassutigaa.
