VIDEO Ilinniarnertuunngorniat oqaatsivut pillugit sammisaqartut
Oqaatsillu pillugit misissuisitsillunilu atuartitseriaaseq inuusuttut inuttut imminnut nassaariniarnerminnut sunniuteqartarsimanersoq ilinniartitsisup maluginiagaasa ilagisimavaat.
- Oqaatsivut maluginiarsigit imatut siunertaqarpoq: Inuusuttut isaanni maluginiagaanni oqaatsitta qanoq inissisimaneranik takutitsisarnissaat. Uanga ilinniartitsisutut nammineerlunga tunuaniittuusarpunga ilinniartitsigaangama, taava ilinniartut namminneerlutik sammisassaq soqutigisartik saqqummiuttarpaat.
- Soorunami ilinniartitsinerup ingerlanerani oqaluttuarineqaqqaartarpoq oqaasilerinermi sumiorpaluutit, nagguissiuinerit oqaasilerinerillu naliginnaasut atorneqartarput, taava kisianni aamma oqaatsitta oqaluttuassartaa aamma atuartitsissutigisarparput. Pingaaruteqarluainnarporlu aamma taanna takutinneqartarnissaa, Qeqqani Ilinniarnertuunngorniarfimmi ilinniartitsisoq, Margrethe Thårup Andersen KNR-imut oqarpoq.
Unnuit pingasut Qeqqani Ilinniarnertuunngorniarfimmi Oqaatsivut maluginiarlugit innuttaasunut sammisaqartitsipput
Ippassaq unnukkut, aaqqissuussinermi unnuit naggataanni, Sivert Olsen Ilinniarnertuunngorniarfimmit ilanngutassiivoq.
Ippassaq qulaqutarineqarpoq: Ilitsoqqussarinagu oqaatsit inuunermi atukkat.
Ilinniarnertuunngorniarfimmilu ilinniartut sooq kalaallit oqaasiisa ilinniaruminaatsinneqartarnerannik misissuisimapput:
- Kalaallisut ilikkarniarnerup qanoq ajornartiginera inummiik inummut assigiinngitsorujuusarpoq. Uannut una ajornartorsiutaavoq, qallunaanik ikinnguteqarama ilagisartorujussuusannik, angajoqqaakkalu qallunaatuinnaq oqaloqatigisarlugit.
- Taamaallaat atuarfimmi kalaallisooraangatta kalaallisut oqaluttarama. Kalaallisoornermi aatsaat kalaallisut oqaluttarneq amerlasuunut naammanneq ajorpoq. Taamaammat pisariaqartinneqarpoq imminut kalaallisut oqalunnissamut pinngitsaalinissaq. Allanik kisianni aamma peqquteqarsinnaavoq, Emil Lyberth Hedemand, ilinniarnertuunngorniaq KNR-imut oqarpoq.
Kira, illit kalaallisut oqaluttuunak kalaallisut oqalunneq ilinniarpat, uani aaqqissuussinermi suna ilikkagaqarfigaajuk?
- Paasivara oqaatsitik pillugit qinngasaartittartut ikinnerulersimasut. Imaallaat uanga aamma nangiarunnaarpunga, soorlu januaarimi aperisimasuugussinga nangiarlunga naameersimassagaluarpunga, Kira Laue, ilinniarnertuunngorniaq KNR-imut oqarpoq.