Hans Enoksenip piaartumik avaleraasartoortassiissuteqarnissaq neriorsuutigigaa

Sulisitsisut naapertorlugit suliffeqarfiit naammattumik piareersarsinnaanatik pisassiissutit affaat ataallugit taamaallaat aalisarsinnaasarnerat isornartorsiuinermi peqqutit ilagaat.

Avaleraasartoortassanilli tunniussinermi ukioq kingulleq isornartorsiuinerit tusarnaarsimallugit, aalisarnermut piniarnermullu naalakkersuisup erseqqissaatigaa. 

- Tassa sapinngisarput tamaat sukkasuumik suliariniarsarivagut, soorunami aamma tusarniagassat allallu, piumasaqaatit malillugit tusarniaasussaatitaanerit ingerlasussaammata, tamakku tamarmik ingerlapput, taavalu tassa naammassiniariarpat taanna Naalakkersuisunut apuunneqassaaq, neriuppungalu ungasippallaanngitsukkut naammassineqassasut, aalisarnermut piniarnermullu naalakkersuisoq, Hans Enoksen Qanoruumi ippassaq oqarpoq.

Ungasippallaanngitsorli qaquguunersoq aperineqarami, Hans Enoksen erseqqinnerusumik akissuteqanngilaq: 

- Tassa ungasippallaanngitsut aqaguusinnaavoq aamma aqaguaguusinnaavoq, kisianni aqaguaguunngilaq tassa naammassiniariarpata Naalakkersuisunut saqqummiunneqassapput, Hans Enoksen oqarpoq.

AAMMA ATUARUK Ukioq manna avaleraasartoortassat aalajangersarneqartut

Ukioq kingulleq avaleraasartoortassiissutit 85.000 tonsiusut ukioq manna pisassiissutigineqartut sanilliukkaanni 20.000 tonsit missaannik ikinnerupput.
 
Tamanna ilutigalugu Inatsisartut upernaami ataatsimiinnerminni avaleraasartuunut akitsuut appartinneqassanersoq aalajangiiffigissavaat. 
 
Ukioq manna aningaasaqarnermut inatsit naapertorlugu avaleraasartoorniarneq nunatta karsianut 40 millionit koruuninik iluanaarutaassaaq, Naalakkersuisullu tamanna akitsuutip apparneranit sunnerneqarsinnaassasorinngilaat.
 
Akitsuutimmi apparneranit avaleraasartoortarineqartartut 25.000 tonsinik amerlanerussasut naatsorsuutigaat.
 
- Tassa neriuppunga pisassat ukioq manna 66.000 tonsiusut tamarmik qaqinneqassasut aammalu isumalluarfigaarput, tassami siusinnerusumik aalajangiisoqassaaq massakkullu tassa suliassat sapinngisarput tamaat tuaviuullugit suliarivagut, Hans Enoksen oqarpoq.

AAMMA ATUARUK Avaleraasartuunut akitsuutip appartinneqarnissaa GE-p taperseraa

Tassa Naalakkersuisut naapertorlugit naatsorsuutigisat anguneqassagunik ukioq manna avaleraasartoortassiissutit 60.000 tonsiusut aalisarneqassapput.