Avaleraasartuunut akitsuutip appartinneqarnissaa GE-p taperseraa
Siunnersuulli tigulluarneqaraluartoq, GE-p allamik aaqqiissuteqarnissaq suli pisariaqarsoraa.
- Akitsuutinik allannguineq naammanngilaq, angallatit aalisartussat suut piumasarineraat aamma misissorneqartariaqarpoq, Sulisitsisuni pisortaq, Brian Buus Pedersen oqarpoq.
AAMMA ATUARUK Ukioq manna avaleraasartoortassat aalajangersarneqartut
Akitsuut appartinneqassaaq
Taamaammat taassuma pisassiissutissat agguaanneqapallaqquai.
Sulisitsisullu kalaallit angallataataasa avaleraasartoortaasa kiilumut akitsuutaasa 95 øremiit 40 øremut appartinniarneqarnerat qiimmatsaatigaat.
Aammattaaq akitsuusersuutit apparneqarnerat nunani allamiut angallataataasa
iluanaarutigissammassuk nuannaarutigaat.
Siunnersuut naapertorlugu taakku avaleraasartoortaminnut kiilumut 1 koruunimik akiliisassapput, taamaalillutik kiilumut 50 øremik akiliinikinnerulissallutik.
- Isumaqarpugut silatusaarnerusoq, ukiormi kingulleq malugaarput, nunani allamiut avaleraasartoorniaqataanissaminnut akitsuutit qaffasigisimarpasikkaat, Brian Buus Pedersen oqarpoq.
Nunatta karsiata isertitai nikissanngillat
Akitsuulli apparaluartoq ukioq manna avaleraasartoorniarneq nunatta karsianut 40 millionit koruuninik isertitaqaataassasoq, Naalakkersuisut naatsorsuutigaat.
Siunnersuut naapertorlugu ukioq mannamut aningaasaqarnermut inatsimmut missingersuutigineqartunit 25.000 tonsinik amerlanerusunik aalisartoqarnissaatigut akitsuutip apparnera malunnarnikitsissavaa.
AAMMA ATUARUK Enoksen pisassiiaartoqarnissaanik neriorsuisoq
Pisassiissutinik pilertornerusumik agguaassineq
Sulisitsisulli anguniagaq piviusorsiortuunersoq oqaaseqarfigerusunngikkaluarlugu ukiuni marlunni kingullerni 30.000-inik 35.000 tonsinillu aalisarnermiit pitsaanerusumik angusaqarnissamut piaartumik aallartittoqartariaqarnera qularutiginngilaat.
- Pisassiissutit agguaatipallanniarsigit, pineqartut aalisarnissamut piaarnerpaamik piareersarniassapput, Sulisitsisuni pisortaq, Brian Buus Pedersen oqarpoq.
Siunnersuut tallimanngorpat siullermeerlugu suliarineqassaaq, akuerineqassappallu pilersaarutigineqarpoq juunip aallaqqaataa aallarnerfigalugu atuutilissasoq.