GBU-p millionit pikkorissunut atorniarpai
Futsalimik nunanut allanut unammisartut aallarlutik sungiusariarnissaannik unammigiarnissaannilluunnit pilersaarusiorniarneq oqitsuinnaaneq ajorpoq. Angalanissamummi periarfissanikkaanngat GBU aningaasassarsiortariaqartarpoq, aningaasaliisoqarnissaali nalugaanni pilersaarusiornissaq ajornarsinnaasarpoq.
Assersuutigalugu Nunatta unammisartui Kroatiamut qaaqqusaagaluarnikuupput, GBU-li qujaannartariaqarnikuulluni.
AAMMA ATUARUK Grønland må melde afbud til futsal-turnering i Kroatien
Maannali ukiuni sisamani tulliuttuni pissutsit allanngorallassapput. Tassami GBU Elite Sport Greenlandilu isumaqatigiissusiorneratigut, GBU futsalertartunut pikkorissunut siuarsaanermut atugassanik 3 millioninik aningaasaliiffigineqarpoq. Tamannalu GBU pilersaarusiorluarsinnaalerneranik isumaqarpoq.
Nuna tamakkerlugu futsalertartunik, sungiusaasunik dommerinillu inerisaanermut aningaasat atorneqassapput. Tamanna GBU-mit nuannaarutigineqarpoq:
- Nunanut allanut unammisartut unammisarnissaat isumaginiassavarput. Sapinngisamik nunanut allanut arlalinnut unammisarlutik, pisinnaaguttalu unamminerit ilaat nunatsinni pisarnissaat anguniassallugit, GBU-mi siulittaasoq, John Thorsen, KNR-imut oqarpoq.
Nunanut allanut unammisartut sungiusaasuat aamma nuannaarpoq.
- Maanna piffissaq ungasinnerusoq eqqarsaatigalugu pilersaarusiorsinnaanngorpugut. Sumi qaqugulu pikkorissaassaagut aammalu unammiuaarnerit sorliit peqataaffiginiassavagut, Tekle Ghebrelul KNR-imut oqarpoq.
GBU siulittaasuata oqaatigaa kattuffiup aningaasanik tunineqarnera pissutissaqarluartoq. Kalaallit unammisartui takutitsilluarnikooqaat. Aamma Nordic Cuppimi peqataanermi takutitsilluarput, ilaatigut Norgimut ajugaanikkut.
- Ilungersornikkut angusaqarsinnaanerput upperineqarlualernermik kinguneqarpoq, tapiiffigissalluta soqutiginnittoqaleriartorluni, Thorsen oqarpoq.
Taassuma aamma oqaatigaa nuna tamakkerslugu futsalertartut siuarsarneqassasut, tamannalu ilaatigut katersuutsitsisarnikkut pissasoq.
AAMMA ATUARUK Nunanut allanut unammisartut piareerput
AAMMA ATUARUK Futsalimik nunanut allanut unammisartut piareersartut
