Soraarsitsineq Nassuiaatigineqartoq pissusissamisoorsorineqanngialq

Henrik Lethip soraarsitaaneranut nassuiaatigineqartoq eqqunngippat, suna pissutaanersoq isumaliutigineqalersinnaavoq.

Inuiaqatigiinni pissutsinut ilisimatuutut Ilisimatusarfimmut attaveqartoq, Naatsorsueqqissaartarfimmilu ukiuni 15-ini pisortaasimasoq, Birger Poppel, taama oqarpoq.

Henrik Lethip Sulisitsisut Peqatigiiffianni siulittaasuunera Naatsorsueqqissaartarfiup siulersuisuinit soraarsitaaneranut pissutaasoq, aningaasaqarnermut naalakkersuisup Aqqaluaq B. Egedep Qanoruumut sisamanngormat oqaatigeqqippaa.

AAMMA ATUARUK Aqqaluaq B. Egede soraarsitsinini pillugu nassuiaavoq

 - Uangalu naalakkersuisutut qaqissimavara, ilumut Nunatta Naatsorsueqqissaartarfiata kisitsisaasa, inuiaqatigiit aningaasaataasa, soqutigisarsiortumik suliarineqannginnissai aamma bestyrelsimi soqutigisarsiortumik ilaasortaqannginnissaa qulakkeerusullugu, Aqqaluaq B. Egede sisamanngormat taama oqarpoq.

Taamali nassuiaanera ataqatigiinngitsoq, Henrik Lethillu siulersuisuni ukiuni marlunni suli atuuffeqartussaagaluarnerata kipitinnissaanut pissutaasussaanngikkaluartoq, Birger Poppel isumaqarpoq.

Tamannalu soraarsitsinermut apeqqutilliititsisoq, ilisimatooq oqarpoq.

- Ataqatigiinngilluinnartumik nassuiaateqaraanni soraarsitsineq sumik pissuteqarnersoq pillugu nalornilersitsisoqarsinnaavoq sumillu pisorqarpiarneranik eqqoriartaarinermik allaartitsisinnaalluni. Nunalu tamakkerlugu naatsorsueqqissaartarfimmut qularuteqartoqartussaanngikkaluarpoq,Birger Poppel oqarpoq.

AAMMA ATUARUK Henrik Lethip ilaasortaajunnaarsitaanera siulittaaasup paasiuminaatsikkaa

Tønnes Berthelsen Henrik Lethip taartissaatut Aqqaluaq B. Egedemit toqqarneqarpoq. Tønnes Berthelsenilu KNAPK-mut pisortaagallartutut, Henrik Lethituulli, kattuffimmut attuumassuteqartuuvoq