Henrik Lethip ilaasortaajunnaarsitaanera siulittaaasup paasiuminaatsikkaa
Henrik Lethip Nunatsinni Naatsorsueqqissaartarfiup siulersuisuinit ilaasortaajunnaarsinneqarsimanera Atuagagdliutini pingasunngornermi allaaserineqarpoq. Naatsorsueqqissaartarfiup siulersuisuini ilaasortat ukiuni pingasuni ilaasortaasussatut toqqarneqartarput Henrik Lethilu ukiuni marlunni suli ilaasortaasussaagaluarpoq.
Taamaammat Henrik Lethip Naalakkersuisunit maannaannaq ilaasortaajunnaarsinneqarnera siulersuisuni siulittaasup Vøgg Løwe Nielsenip paasiuminaatsippaa.
- Ilaasortatut ingerlaannarnissaata iluaqutissartaqannginnera paasisinnaanngilara.
Siulersuisuni ilaasortat allat siulittaasorlu ilaasortaajunnaarsitsinissamut akuutinneqarsimanngillat. Henrik Lethip taarserneqarnissaminik allagarsiaata assilineqarnera Vøgg Løwe Nielsenimut nassiunneqarsimavoq. Siulersuisunilu siulittaasoq ilaasortaajunnaarsitsineq pillugu nassuiaammik tunineqarsimanngilaq.
- Allakkani allassimavoq siulersuisut katitigaanerat suliassallu pissutigalugit ilaasortaajunnaarsinneqartoq.
AAMMA ATUARUK Henrik Leth siulersuisuni ilaasortaajunnaarsinneqartoq
Ilaasortaajunnaarsinneqartoq, Henrik Leth, pisoq pillugu KNR-imit apersorneqarusunngilaq, oqaatigaali ilaasortaajunnaarsitaariasaarnini pillugu aamma nassuiaateqarfigineqarsimanani.
Siulersuisuni ilaasortat ukiunut pingasunut toqqagaasarnerisa Naalakkersuisunit isiginiarneqarsimannginnera Vøgg Løwe Nielsenip ajornartorsiutitut isigaa. Ukiunimi taakkunani pingasuni ilaasortaanerup Nunatsinni Naatsorsueqqissaartarfiup arlaannaanulluunniit attuumannginneranik qulakkeerinnittuummat.
Taamaaliornikkummi kisitsisitigut paasissutissanik politikkimut aalajangersimasumik siunnerfilimmut tulluarsakkanik pilertortitsisoqannginnissaa imaluunniit kinguarsaasoqannginnissaa ilaatigut qulakkeerneqartussaammat.
- Taamaammat ilaasortamik maanaannaq taarsiisoqarnera naatsorsueqqissaartarfiup tatiginassusianik sanngiillisitseqataasinnaavoq.
Siulersuisut ullualuit qaangiuppata ataatsimiilerunik siunissami taamatut ilaasortaajunnaarsitsisoqaqqinnginnissaa misissorniarpaat.
- Siulersuisut ataatsimiilerpata tamanna soorunami misissussavarput, taamatullu pisoqaqqinnissaa pinngitsoortinniarlugu oqaasertaliussanik allanngortitsisoqarsinnaanersoq misissussavarput.
AAMMA ATUARUK Henrik Lethip ilaasortaajunnaarsitaanera siulittaaasup paasiuminaatsikkaa
Naalakkersuisoq Aqqaluaq B. Egede ilaasortaajunnaarsitsinermut nassuiaateqartikkumallugu KNR-ip ippassaq ulloq naallugu pissarsiariniarsarigaluarpaa. KNR-illi saaffiginnissutai akissuteqarfiginngilai.
Henrik Lethip siulersuisuni ilaasortatut taartissaa tassaavoq Tønnes Berthelsen KNAPK-meersoq.
