Aqqaluaq B. Egede soraarsitsinini pillugu nassuiaavoq

Henrik Leth kattuffik sinnerlugu ilaasortaanera peqqutaalluni Naatsorseqqissaartarfiup siulersuisuinit soraarsinneqartoq aningaasaqarnermut naalakkersuisoq Aqqaluaq B. Egede Aqqaluaq Egede nassuiaavoq.
apriilip 27-at 2017 13:51

Henrik Leth ukiuni arfineq marlunni siulersuisuini ilaasortaareersoq tamassuma ajornartorsiutinngorsimanera ersernerluppoq.

Tunuartitaaneranut tunngavilersuutigineqartoq uissuumminarpoq siulersuisuni ilaasortanngortup kattuffik sinnerlugu ilaasortanngormat, tassalu KNAPK, kiisalu Naalakkersuisut inatsimmi nassuiaaniarnerat paasiuminaalluni.

Naatsorsueqqissaartarfik pillugu inatsisartut inatsisaat Aqqaluaq B Egedep innersuussutigisaani  allassimavoq, siulersuisuni ilaasortat ukiut pingasut qaangiukkaangata Naalakkersuisut allanik toqqaasassasut. Inatsimmilu oqaasertaliussami 1999-meersumi allassimavoq, siulersuisuni ilaasortat inuttut piginnaasaat aallaavigalugit naalakkersuisuinit toqqarneqartassasut taakkualu oqartussaasunit kattuffinniillu aalajangersimasunit sinniisuussanngitsut. 

AAMMA ATUARUK Henrik Lethip ilaasortaajunnaarsitaanera siulittaaasup paasiuminaatsikkaa

Aqqaluaq B Egedellu oqarnera naapertorlugu Henrik Leth siulersuisuni ilaasortaanera inatsisinik unioqqutitsineruvoq taannami Sulisitsisut peqatigiiffiata siulersuisuini ilaasortaavoq 

- Naatsorsueqqissaartarfimmi siulersuisuni ilaasortat inuttut piginnaasai aallaavigalugit  qinerneqartassapput, taakkualu oqartussaasunut kattuffinnillu aalajangersimasunut  sinniisuunngitsut, uanilu inuk oqallisigisarput (Henrik Leth, aaqq.) kattuffimmut sinniisuuvoq, Aqqaluaq B Egede oqarpoq. 

AAMMA ATUARUK Henrik Leth siulersuisuni ilaasortaajunnaarsinneqartoq

Henrik Leth sulisitsisut peqatigiiffianni siulersuisuni siulittaasuunermi saniatigut aningaasarsiorneq pillugu ilinniagaqarpoq naatsorsueqqissaarneq immikkut ilinniagaralugu naatsorsueqqissaarfiullu siulersuisuni ukiuni arfineq marlunni ilaasortaavoq. 

Henrik Leth taarserlugu Tønnes ´Kaka`Berthelsen siulersuisuni ilaasortanngorpoq, taanna kattuffik sinnerlugu suliaqartuuvoq, tassami  KNAPK-ip  allattoqarfiani pisortaavoq.

Tønnes Berthelsenip toqqarneqarnera pillugu Aqqaluaq B Egede ima oqarpoq:

- Kattuffinnut soqutigisaqaqatigiinnullu aalajangersimasunut pituttorsimanngitsumik nunatta inuiaqatigiillu aningaasaatai suliarineqassapput, Aqqaluaq B. Egede oqarpoq.