Kulturi

Filmi siumut takorluukkersaarut immiunneqarpoq

Filmiliortartoq Aka Hansen Danmarkimi filmiliornermik ilinniaqatini, filmiliortartullu allat peqatigalugit filmimik nangeqattaartumik filmiliorput, taanna ateqarpoq Polar. Immiussassallu kingulliit Nuummi immiutileruttorpaat.

Allattoq Nathan Kreutzmann

maajip 18-at 2017 11:05

Filmiliortartut filmiliami nangeqattaartussami immiussassat kingulliit isumagileruttorpaat.

- Nuannersorujussuuvoq. Inuppassuit tapernikuugamitigut ikiuullutik suleqataallutillu. Taannartaa nuannersorujussuuvoq. Ingerlalluaqaagut, Aka Hansen taama oqarpoq.

Aka Hansen Danmarkimi filmiliornermik ilinniarfimmi, Super16-imi ilinniarnerminut atatillugu filmiliortartut allat aqqanillit peqatigalugit maanna Nuummi filmiliorput. Nangeqattaartuliaat Polar tallimanik immikkoortoqassaaq.

Taanna siunissamut takorluukkersaarutaavoq, sci-fi-imik taaneqartartoq, nunatsinnilu nutaajulluni.

- Una sci-fi allaanerulaarpoq aamma aatsaavissuaq nunatsinni suliarineqarami. Taannartaa nutaajuvoq, Aka Hansen oqarpoq.

AAMMA ATUARUK Filminik suliaqarfiup kalaallit nangeqattaartuliaat taperseraa

Kulturit kattunneqarput

Aka Hansen filmiliornerup silarsuaani aatsaat takulinngilarput. Qiiaammisaarnartuliaq alutorineqartoq "Qaqqat Alanngui" aamma ingerlatsisuuffigisaasa ilagaat.

Maannakkut nangeqattaartuliami inuusuttut qitiupput. Taakku pinngortitamiit nipi nuanniitsoq tusaavaat, taannalu nipi oqariartuuteqarpoq arlaannik ajortoqartoq. Inuusuttut nipi tusarniigalugu imminut toquttalerput, filmimi pingaanertut inuttaatinneqartoq Ivik kisimi pinnani.

Filmimilu aamma kalaallisut danskisullu oqaatsit atorneqarput.

- Kalaallisut qallunaatullu akulerullugit sulivugut, oqaasertai akulerullugit aamma kulturitai akulerunniarsaralugit, Aka Hansen oqarpoq.

Aka qilanaarpoq

Polarip piviusunngortinniarnerani aningaasassarsiorneq unammillernartut ilagivaat. Maannali aningaasat naammatsissimalerpaat, ingerlatsisorlu nangeqattaartup takutinneqaqqaarnissaanut utaqqisinnaanngingjappoq.

- Qilanaartorujussuuvunga. Inuppassuit pikkorissut suleqataagamik. Ingammik aamma isiginnaartitsisugut aatsaavissuaq isiginnaartitsigaluarlutik pikkorissorujussuugamik. Tannartaata takutinnissaa qilanaarisorujussuuara, Aka Hansen taama oqarpoq.

Nangeqattaartuliaq Polar Danmarkimi oktobarimi takuteqqaarneqassaaq, aammali nunatsinni takutinneqarnissaa angorusunneqarpoq.

Aammali internettikkut takuneqarsinnaanissaa sulissutigineqarluni.