Aningaasanut inatsit ataatsimiititaliamut ingerlateqqinneqartoq
Aalisarnermut inatsisissaq nutaaq politikerit Inatsisartuni akunnerit sisamat missaanni oqallisigaat. Ataatsimut isigalugu politikerit amerlanerussuteqartut aaqqissuusseqqinnissamut tunngaviit, tassalu aalisakkat pisuussutinillu piginnittut siammarnerunissaat tapersersorpaat.
Inatsisissamut siunnersuut ilimagineqareersutut Siumup Partii Naleqqallu ersarinnerpaamik tapersersorpaat. Inuit Ataqatigiilli oqaaseqartuat Hans Aronsen arlalinnik nangaassuteqartoq, Inuit Ataqagiit piumasarimmassuk aalisarnermut inatsit nutaaq nunap aningaasaqarneranik eqquinerlussanngitsoq.
Taama piumasaqarneq siunnersuutigineqartumit eqquutsinneqarnavianngilaq, Naalakkersuisummi naatsorsuutaanni ukiumut koruuninik 180 millioneqartassaaq.
AAMMA ATUARUK Sanngiinnerit aalisarnermut inatsisissamit eqqugaasinnaasut
Aronsenili aamma oqarpoq IA isumaqartoq inatsisissatut siunnersuut amerlasuunik partiip suleqataaffigerusutaanik imaqartoq.
Illuatungilittut Demokraterne attaviitsorlu Michael Rosing siunnersuummut isorininnersaapput siunnersuullu itigartinneqaqqullugu.
Naalakkersuisut inatsisissatut siunnersuutip sunniutissaanik ajunngitsunik saqqummiussinnginnerat Demokratet akueriuminaatsippaat. aammalu oqarlutik inatsisip inuiaqatigiinnut sunniutigisinnaasai assut akunnattoornartut.
Michael Rosingip Siumup oqaaseqartitaa aperaa Naalakkersuisut pisassiissutit agguaatassaat kikkut piumaarneraat; innersuussutigalugu aalisarnermut ataatsimiititaliap upernaaq agguaassisarnermut isumaliutissiissutaani avataasiortut sinerissallu qanittuani raajarniartut 50/50-mik avissagaat.
AAMMA ATUARUK Aalisarnermut inatsisissaq Enoksenip mianersoqqussutigaa
Raajartassat agguaattaarnerinik allannguinermi raajartassaatillit pingaarnerutinneqassasut ataatsimiititaliaq isumaliutissiissummini allappoq. Rosingip erseqqissarusutaa tassa raajartassaateqarsimasut maanna tamaasa tunereersimammatigit, maannali politikerit imaassinnaavoq tamakku utertikkaat.
