Sanngiinnerit aalisarnermut inatsisissamit eqqugaasinnaasut
Aalisarneq pillugu inatsisissatut siunnersuut naligiinnginnerup akiorniarneqarnissaanik siunertaqarpoq, inuilli aalajangersimasut ikitsuinnaat siunnersuutigineqartoq iluaqutigissavaat, siunnersuisoqatigiinnit taama oqaatigineqarpoq.
- Siullertut, siunnersuut Namminersorlutik Oqartussat isertitakinnerulernerannik kinguneqassaaq, taamaalisoqarneranilu inuiaqatigiinnut tamanut sunniuteqassalluni.
Aningaasaqarnermut siunnersuisoqatigiit siulittaasuat, nunallu aningaasaqarnerat pillugu professori, Torben M. Andersen, aalisarneq pillugu inatsisissatut siunnersuut, Naalakkersuisut maanna tusarniaassutigisaat pillugu taama oqarpoq.
Siunnersuummut oqaasertaliunneqarsimasut isumaqataaffigai, Namminersorlutimmi Oqartussani atorfilittat allapput siunnersuut inuiaqatigiinnut kalaallinut aningaasartuutaalissasoq.
AAMMA ATUARUK Politikkikkut siunertarineqartoq aningaasanit pingaarnerusoq
Torben M. Andersen nassuiaavoq Namminersorlutik Oqartussat isertitakinnerulerpata tamanna innuttaasunut sanngiinnerusunut sunniuteqarnerpaassasoq, assersuutigalugu ilinniartitaanermut, peqqinnissamut isumaginninnikkullu tunniuttakkanut, soorlu pisortanit ikiorsiissutinut utoqqalinersiutinullu aningaasat ikinnerulissammata:
- Namminersorlutik Oqartussat suliaqarfigisaat inuiaqatigiinni agguaasseqqinnermik kinguneqartarput, tamannalu sanngiinnerusunut annerusumik iluaqutaasarluni, isertitallu ikinnerulerpata tamatumani tatisisoqassaaq, siulittaasoq taama oqarpoq.
AAMMA ATUARUK Umiarsuaatileqatigiiffiit eqqartuussivilersuussinissamik Kielsenimut sioorasaaruteqartut
Siunnersuutigineqartorlu inuiaqatigiinnik piitsuunerulersitsissagaluartoq, Naalakkersuisut siunnersuutigisartik aqqutigalugu inuiaqatigiinni naligiinnerulersitsinissamik siunertaqarput. Assersuutigalugu raajartassiissutit ingerlatseqatigiiffinnut amerlanerusunut agguaanneqartassapput.
Tamannali naligiinnerulersitsissanngilaq, taamatut aaqqiissuteqarneq nalaatsornerinnarmik imaqarmat, inunnullu ikitsuinnarnut iluaqutissartaqassalluni:
Kikkut pissarsinissaannik, kikkullu pissarsinnginnissaannik (pisassiissutinik, aaqq.) eqqorniaanermik imaqassaaq. Pissarsisoqassaaq, allallu pissarsinngitsuussallutik. Taamatullu agguaassinermut politikkimik ingerlatsinissaq naleqquttuussanersoq apeqquserparput.
AAMMA ATUARUK Først solgte de kvoterne - nu får de dem tilbage
Aalisarneq pillugu inatsisissatut siunnersuut KNR TV-p aallakaatitassiaani Isummersorfimmi unnugu nal. 20 oqallisigineqassaaq.
Aalisarnermut naalakkersuisup Karl-Kristian Krusep isornartorsiorneqarnini tamatumani akissuteqarfigissavaa.
Aallakaatitassiaq KNR 2-kkut toqqaannartumik oqaluttaasoqartillugu nal. 20 aamma isiginnaarneqarsinnaavoq.
