Eqqumiitsuliortut 200-t Nuummut ukiaru festivalimukassapput
Nipilersortartut, isiginnaartitsisartut eqqumiitsuliortullu assiginngitsut 200-nit ikinnerunngitsut Nuummut tikinnissaat piareersangaatsiareerpaat.
- Nuummi eqqumiitsuliortut kulturilerisullu suleqatigalugit siammasissorujussuarmik pilersaarusiorpugut. Sorpassuit sammineqarsinnaassapput, soorlu nipilersornermii, illuliortariaasermut, assilialiornermut filminullu tunngasut, sulinermi ataqatigiissaarisoq Pipaluk Lind oqarpoq.
Kulturikkut pikialaartitsineq Nuuk Nordisk Kulturfestival 2017-imik taasaq ukiaru oktobarimi ingerlanneqassaaq.
AAMMA ATUARUK Kalaallit USA-mut nipilersoriartut
Eqqumiitsuliortut Nunani Avannarlerneersut, aammali Canadameersut aamma Korea Kujallermeersut tikittussat ilagaat. Festivalernerli aamma nunatsinnut sunniuteqarluassangatinneqarpoq.
- Eqqumiitsuliornerup kulturilerinerullu tungaatigut Kalaallit Nunaat takutissallugu pingaaruteqarluinnarpoq. Nuup sapaatip akunnera taanna Nunani Avannarlerni qitiutilluinnarneqarnissaa anguniarparput. Taamatullu aamma nunatsinni eqqumiitsuliortut kulturilerisullu pikkorilluinnartut nittarsaatissallugit, Pipaluk Lind oqarpoq.
AAMMA ATUARUK Nunat Avannarliit kultoorisioqatigiileruttorput
Festivali 2015-imi aamma aaqqissuunneqarpoq, Georgine Graversenilu taamani isumassarsisuuvoq.
Nunatsinni festivalertarnerit takussaanerusut ulluni ikittuinnarni pisartut takusareerlugit allannguerusulerpoq.
- Taava eqqarsarlunga: "Taamaattuinnarnik festivaleqarsinnaanngilagut maani Nuummi allatut aamma eqqarsartariaqarpugut kulturip tungaatigut assigiinngitsorpassuartigullu tungaatigut, sulinermi ataqatigiissaarisoq Georgine Graversen oqarpoq.
Maannalu ukiut marluk qaangiutilerneranni festivali annerusussaasoq paasereerpaa.
- Nuanneqaaq tulluusimaarnaqaaq aamma tanngassimaarnaqaaq. Una festivali takusinnaagatsigu massakkut anginerujungaatsiartoq 2015-iminngaanniit, Georgine Graversen oqarpoq.
Nuuk Nordisk Kulturfestival 2017 Kommuneqarfik Sermersuumit aamma NAPA-mit pigineqartoq suliami ingerlatsisup Rickard Borgströmip oqaatigaa.
