PITUFFIK Eqqartuussutip inernera ingerlatseqatigiiffiit suliareqqitassanngortikkaat

- Exelisip isumaqatigiissummik tunineqartariaqarnera isumaqataaffiginngilarput. Taamaammat eqqartuussutip inernera suliareqqitassanngortinniarlugu aalajangerpugut.

Copenhagen Arctic A/S-imi pisortaaneq Jeppe Handwerk KNR-imut taama oqarpoq.

Entreprenøritut ingerlatseqatigiiffik Per Aarsleff A/S peqatigalugu Copenhagen Arctic A/S-ip amerikamiut eqqartuussiviata juulimi eqqartuussutaa suliassanngorteqqippaa.

Eqqartuussiviup aalajangiinera malillugu, 2014-imi suliariumannittussarsiuussineq naapertorlugu Exelis Services kiffartuussinissamik isumaqatigiissummik tunineqartussaavoq.

Suliariumannittussarsiuussinermi atortut eqqortuussapput

Amerikamiut sakkutuuisa suliariumannittussarsiuussinermi atortussatut suliarisimasaata kukkuneqarnerat eqqartuussisut pingasuusut juulimi eqqartuussinerminni akueraat, ingerlatseqatigiiffiit suliariumannittussarsiuussinermi peqataasut Danmarkimi inuussutissarsiutinik ingerlataqartut allattorsimaffianni suliffeqarfittut allamiunit pigineqartutut nalunaarsorneqarsinnaasimanngimmata.

Kukkunerlu taanna danskit nunanut allanut ministereqarfiata misissuinermini aaqqissimanngilaa, naak suliariumannittussarsiuussinermut tunngatillugu pingaaruteqarluinnaraluartoq.

Aamma atuaruk Pituffik pillugu suliaq aalajangiiffigineqartoq

Taamaammat Exelis Servicesip suliariumannittussarsiuussinermi malittarisassanik eqquutsitsisimaneranik inerniliisoqarpoq.

Sulialli eqqartuussivimmit naliliiffigeqqinneqarneratigut ingerlatseqatigiiffiit suliariumannittussarsiuussinermi atortunik tatigisaqarsimanerisa pingaaruteqassusiata pingaarnerutinneqarnissaa, Jeppe Handwerkip neriuutigaa.

Aamma atuaruk Danskit politikeriisa ministeri Pituffik pillugu isumasioqatiginiaraat

- Suliariumannittussarsiuussinermi atortut eqqortuunissaat inatsisillu malillugit suliarineqarsimanissaat neqerooruteqartut qulakkiigassarinngilaat. Taamaattoqassappammi allamik suliaqarnavianngikkaluaratta (…). Uagut isumaqataaffiginngilluinnarparput, pisortaaneq oqarpoq.

Aalajangeeqqittoqarnissaanut periarfissaqalaartoq

Suliassanngortitseqqiineq 'rehearing'-imik ilaqassaaq, tassalu tusarniaaqqinnermik, tassanilu eqqartuussisut kingulliit pingasuusut eqqartuussisut allat arlaqartut peqatigalugit suliaq nalilersuiffigeqqittussaassavaat.

Suliallu tusarniaaqqittoqarnerani ikitsuinnaat atortussaajunnaarsinneqartaraluartut, misiliinissaq peqqutissaqartoq, Jeppe Handwerk isumaqarpoq.

 Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera

- Tunngavimmik malitaqarpugut: Isumaqataanngikkaanni ilungersoqqittoqartariaqarpoq. Taamaaliorpugullu. Aamma amerikamiut kukkusimanerannik tamatumalu iluarsineqartariaqarneranik paasitinniarnissaannut nunanut allanut ministereqarfimmit pisariaqartumik tapersersorneqarnissarput naatsorsuutigilluinnarparput.

Amerikamiut sakkutuuisa timmisartortartut kissaateqarnerat naapertorlugu suliassanngortitseqqiinissamut piffissaliussaq aggustip 18-ianit 26-anut ullunik 14-inik kinguartinneqarpoq.

Ingerlatseqatigiiffiup Greenland Contractors A/S-ip, Pituffimmi kiffartuussinissamik isumaqatigiissummik maanna piginnittuusup, juulimi eqqartuussutip inernera suliassanngorteqqissanerlugu suli isumaliutigaa.