Pituffik pillugu suliaq aalajangiiffigineqartoq
Pituffimmik kiffartuussinissamik 2014-imi suliariumannittussarsiuussisoqarmat, amerikamiut suliffeqarfiat Exelis Services Pituffimmik kiffartuussinissamik isumaqatigiissusiorfigineqarpoq. Isumaqatigiissusiornerlu inatsisitigut tunngavissaqartoq, USA-mi eqqartuussiviit ilaata pisortatigoortumik maanna aalajangerpaa.
Aamma atuaruk PITUFFIK Vectrus sullissilernissaminut qilanaartoq
Exelis Servicesip kiffartuussinissamik isumaqatigiissusiorfigineqarnera USA-mi eqqartuussiviit ilaannit siusinnerusukkut atuuttussaajunnaarsinneqaraluarpoq, akerlianilli maanna tassa aalajangiisoqarluni.
Eqqartuussiviup aalajangigaani saqqummiunneqaqqammersumi tamanna atuarneqarsinnaavoq.
Nalunaarsorsimaneq naammattoq
Exelis Services, amerikamiut suliffeqarfiannit Vectrusimit 100 procentimik pigineqaraluarpoq, Naalagaaffeqatigiillu iluanni adresseqartutut taamaallaat nalunaarsorneqarsimalluni. Tamannalu naammappoq.
Danmarkimi suliffeqarfiit allattorsimaffianni CVR-registerimi nalunaarsorneqarsimanissaq, Danmarkimilu aningaaseriviit ilaanni kontoqarnissaq naammattoq, Danmarkimi oqartussat nalunaarutigaat, piumasaqaatillu taakku marluk Exelis Servicesimit naammassineqartut nalunaarutigineqarpoq.
Aamma atuaruk PITUFFIK Aaja Chemnitz Larsen: Naalakkersuisut akisussaasuupput
Suliffeqarfik suliffeqarfiup allap ataani inissisimasutut Danmarkimi suliffeqarfiit allattorsimaffianni CVR-registerimi nalunaarsorneqarsinnaannginnera, eqqartuussiviup ingerlatitseqqiisarfiup aalajangernermini tunngavilersuutigaa.
Oqaatsit suliariumannittussarsiuussinermi atorneqartut neqerooruteqarsimagaluartunit suliariumannittussarsiuussinerup siorna isornartorsiorneqarsimannginnerat, eqqartuussiviup aamma tunngavilersuutigaa.
Suliffeqarfiimmi isumaqatigiissusiorfigineqanngitsut oqaatsinik neqerooruteqartitsinermi atorneqartunik isornartorsiusinnaassagunik tamanna siusinnerusukkut apuuttussaagaluaraat, eqqartuussiviup aamma oqaatigaa.
Pituffimmik kiffartuussinissamik isumaqatigiissut pillugu maanna qanoq pineqassanersoq, Danmarkip nunanut allanut tunngasunut ministeriata, amerikamiulluunniit oqartuussaasuisa suli nalunaarutiginngilaat.
Aamma atuaruk Qujakitsoq: Eqqartuussut tusaatissatut tiguarput
