Løkke: Namminersulivinnissap oqallisigineqarnerata pingaarutillit ukkanneqanngitsoortippai
Atuakkiortup Issittumilu pissutsinut ilisimannittup Martin Breumip atuakkiaani "Hvis Grønland river sig løs" kalaallisut Kalaallit Nunaat avissaassagaluarpat-mik nutserneqarsinnaasumi ilaatigut Kim Kielsen, Suka K. Frederiksen kiisalu ministeriuneq Lars Løkke Rasmussen nunatta namminersulivissinnaanera pillugu isummersortippai.
Lars Løkke Rasmussenillu isumaa malillugu Nunatsinni namminersulivinnissamut oqallinneq marloqiusamik isumaqarfiginerarpaa. Nunatsinnimi namminersulerusunneq paasisinnaanerarlugulu akuersaarpaa, aappaatigulli oqallinnerup kingunerisaanik nunatsinni ajornartorsiutiviit ukkanneqanngitsoornerinik kinguneqarluni.
- Illuinnaasiortumik immaqalu misigissutsit aallaavigivallaarlugit oqallittoqarsinnaanera ernumagisinnaavara, naak siunissami pissutsit pingaarutillit sammineqarnerusariaqaraluartut. Ilaatigummi makku: Sutigut tamatigut Kalaallit Nunaat imminnut attassisinnaaneq qanoq anguneqarsinnaava? Tassa aningaasatiguunnaanngitsoq inuttulli atugaqarneq eqqarsaatigalugu, Lars Løkke Rasmussen taama oqarpoq ilaatigut Danmarkip ukiumut 3,6 milliardtinik nunatsinnut tapiissuteqartarnera tikkuartuullugu.
AAMMA ATUARUK Espersen: Kalaallit politikerii namminiilivinnissamit tappiillisinneqaqqapput
Maannami qineqqusaaleruttornermi Partii Naleqqap ukioq 2021-mi namminersulivinnissaq ilaatigut qineqqusaarutigaat. Aamma Vittus Qujaukitsup partiiliaa nutaami Nunatta Qitornaani namminersulivinnissaq annertuumik qineqqusaarutigineqarnissaa ilimanaateqarluarluni.
Aamma partiit annerit marluusut, tassa IA-kkut aamma Siumukkormiut namminersulivinnissaq siunniuteqqavaat. Tamarmilli isumaat naapertorlugu namminersulivinnissaq innuttaasut tamavimmik malinnaavigisinnaasaanik ingerlanneqartariaqarsoraat, taamaattumillu namminersulivinnissamut ulluliinissartik tunuarsimaarfigalugu.
Namminersulivinnissamulli oqallinnermut tunngatillugu aningaasaqarniarneq nunattalu iluani pissutsit kisimik aallaavigineqartariaqanngitsut qallunaat naalakkersuisuisa siulittaasuat isumaqarpoq.
AAMMA ATUARUK Nunatta 2021-mi naalagaaffinngornissaa piviusunngortikkuminaassinnaavoq
Matumani nunatta nunat allat pissaanilissuit akornanni pingaarutilimmik inissisimanera eqqumaffigineqartariaqarsoraa. Ministeriunerummi isumaa naapertorlugu nunarput kunngeqarfik Danmarkimiit avissaassagaluarpat nunat pissaanilissuarnit eqqissisimatinneqarunnanngitsoq oqaatigaa.
- Kalaallit isaannit suna tamaat isigissagukku, taava kalaallit nunaat Danmarki peqatigalugu nunarujussuartut pissuseqarnissaa soorluuna pissusissamisoornerusoq, asuli USA, Rusland, Kina nunalluunniit allat ataaniilluni suunngitsutut misigeqinani.
Lars Løkke Rasmussen taama oqarpoq, naalagaaffeqatigiinnerullu attatiinnarneqarnissaa kissaataa annersaasa ilaanerarlugu.
Martin Breumip atuakkiaa apriilip pingajuani Gyldendalip saqqummersissavaa.
AAMMA ATUARUK Løkke namminersornissamik oqallinnermut qisuariartoq
AAMMA ATUARUK Namminiilivinnerup Danmarkimit ikiorsiissuteqartarneq unitsissavaa
