Nalilisartoq: Løkke namminersornissamik oqallinnermut qisuariartoq

Taama oqartoq tassaavoq politikkikkut naliliisartoq Hans Engell. Taanna isumaqarpoq Lars Løkke Rasmussenip (V) taama allagaqarnera peqquteqartoq Danmarkimiit avissaarnissaq oqallisaanerussagunarmat.

- Silatusaarpoq; kalaallit qineqqusaarnerannut iluminnilu assortuunnerannut akulerunneqartarneq anusinngorfigisimagamiuk taama iliorpoq.

- Kalaallit Nunaanni namminersornissamik sakkortuumik ersarissumillu sulissutiginnittoqarpoq. Kalaallit politikeriini oqallorillutik Danmarkimut qajassuaatsumik ilaannilu isumakkersimasunik oqaluttoqartarpoq.

Folketingimi Kalaallit Nunaat pillugu ataatsimiititaliami nunanut allanut tunngasunut naalakkersuisoq Anders Samuelsen (LA) peqatigalugu pingasunngornermi ammasumik isumasioqatigiinnissaagaluaq kinguartinneqarpoq.

Ministeriuneq naapertorlugu Kalaallit Nunaanni qinersinissaq naalakkersuisut akorngusersorusunngilaat.

AAMMA ATUARUK Løkkep taamaatitsinera Aajap Aleqallu assigiinngitsunik isumaqarfigigaat

Ataatsimiinnermi pilersaarutaagaluartumi Anders Samuelsen apeqqutinik amerikamiut sermersuup ataani sakkutooqarfigisimasaannut Camp Centurymut assortuussutaasumut tunngasunik akissuteqartussaagaluarpoq.

Hans Engellip eqqaamanngilaa ministeriunerit siornatigut qinersinerup nalaani ministeriminnik oqaaseqaqqusiunnaarsimanersut. Nalunaarutit taama ittut  tusagassiuutinit pissarsiarisoorneqanngikkunik soorunami pisortatigoortuusanngillat.

Taannarpiaq pissutigalugu Hans Engellip maluginiarpaa ministeriunerup allakkat taakku kaajallaasissimammagit.

- Allakkanik kaajallaatitsinera eqqumiilaarpoq. Ataqatigiissaarinermut ataatsimiititaliap ataatsimiinnerani partiit siulittaasui nalunaarfigisimasinnaagaluarpai, taakkulu ministeriminnut nalunaarut ingerlateqqillugu, Engell oqarpoq.

AAMMA ATUARUK Lars Løkkep nunarput ministeriminut sammeqqunngikkaa