Løkke: Namminiilivinnerup Danmarkimit ikiorsiissuteqartarneq unitsissavaa

Dansk Folkepartiip nunatsinnut tunngasunik oqaaseqartartuata Søren Espersenip apeqquteqaataa oqallinnermi tunuliaqutaavoq. Taassuma ministeriuneq kalaallit namminiilivinniarnerannut suliamik nunallu aningaasaqarneranik nassuiaateqaqquaa.

Ministeriunerup Kalaallit Nunaat namminiivissappat Danmarkimit aningaasatigut ikiorsiisarneq ingerlaannarsinnaannginnera aalajangersimasumik oqaatigaa.

- Kalaallit Nunaata namminiilivinnerata kingorna naalagaaffiup aningaasatigut tapiissutaasa suliassanulluunniit aaqqiissuteqartarnerata ingerlaannarnissaat takusinnaanngilara, Lars Løkke Rasmussen tallimanngornermi oqallinnermi taama tunngavilersuilluni oqarpoq.

AAMMA ATUARUK Kalaallit Nunaanni naammaginanngitsumik ingerlatsisoqarpoq

Ministeriunerup nunatsinni ineriartornerup suliffissaqarnerullu qaffannerisigut aningaasaqarneq pitsaasumiittoq erseqqissaatigaa, nunatsinnili unammilligassarpassuaqarnerarpaa.

- Aaqqissuussinerit isertitallu nutaat pisariaqarput. Kalaallit Nunaata aningaasanut siunnersuisoqatigiivi naapertorlugit atugarissaarneq qulakkeerneqassappat missingersuutini milliardingajannik pitsanngorsaasoqartariaqarpoq.

- Kisitsisimmi nunap naalagaaffeqatigiinniinnera Danmarkillu nunamut aningaasatigut tapersiisarnera malillugu naatsorsorneqarput, Lars Løkke Rasmussen oqarpoq.

Aammattaaq nunatta sanaartornissamut pilersaaruteqarnera – mittarfinnillu nutaanik pingasunik pilersaaruteqarnera ilanngullugu – imminut akilersinnaanngitsoq nunallu aningaasaqarneranut aarlerinartoqartitsisoq, aningaasaqarnermut siunnersuisoqatigiit naliliinerat ministeriunerup erseqqissaatigaa.

- Ataatsimut isigalugu, Kalaallit Nunaat namminiilivinniaruni aningaasaqarnikkut unammilligassaqangaatsiarpoq, Lars Løkke Rasmussen oqarpoq.