Kulturi

Avannaata qimussersuani Sisimiunit peqataasut angerlarneq ajulerput

Avannaata Qimussersuani peqataasunik aamma ukioq manna angerlamut apuunneq sapilertoqarpoq. Unamminermi peqataasut sisamat aaqqissueqataasullu marluk marluk avannaani suli sikuunera pissutigalugu Sisimiunut apuunneq ajulerput

Allattoq Ivik Kristiansen

apriilip 13-at 2015 15:49

- Apriilip aallaqqaataani Qeqertarsuarminngaaniit kujammut aallarpugut. Taamanili aallaratta Sisimiunut tikinngilagut, Avannaata Qimussersuani peqataasoq, Otto Mika Willumsen oqarpoq.

Otto Mika Willumsen Avannaata qimussersuata marsip 28-ni naammassinerata kingorna, Sisimiunut angerlamut ullut tallimat ingerlanerani apuunnissani naatsersuutigisimagaluarpaa.

Aamma atuaruk Qimussersuaqataasut suli apuutinngitsut

Attumi maannakkut unittooqqapput, nunaqarfimmilu uninngagallarnissartik naatsersuutigaat.

- Asukiaq. Tassa taakku sikut kisimi apeqqutaapput. Imaassinnaasoq sivisusoq, Otto Mika Willumsen oqarpoq. Taassumalu angerlarsinnaannginnertik qatsutilerpaa.

Qimmit iluaalliorput

Angerlarnissaalli qimminut aamma pingaaruteqarpoq.

- Ilaquttat tikinneq ajulerlugit, angerlarnerlu ajulerluni assut naalliunnarpoq. Qasunarsisuulerpoq. Qimmillu aamma iluaalliortorujussuanngorput, Otto Mika Willumsen oqarpoq.

Aamma atuaruk William Jensen Avannaata Qimussersuani ajugaaqqippoq

Qimmit nerisassaasa naammakkunnaarnissaat, qimmillu sanigoriartulernerat qimussertartup aamma ernummatigaa. Qimmeqatigiilli sisamat taama sivisutigisumik uninnganertik pissutigalugu imminnut saassuteqqajaalersimapput.

- Qimmit amerlagamik taamatullu angallammiilernerminni ikilersuunnerit ilaatigut annertullutik. Tassa angerlajaarnissarput assut pingaaruteqartorujussuuvoq, Otto Mika Willumsen oqarpoq.