William Jensen Avannaata Qimussersuani ajugaaqqippoq
Avannaata Qimussersua Qeqertarsuarmi ullumi marsip ulluisa 28-anni ulloqeqqartoq aallartippoq.
Apuukkiartortut siulliit Qeqertarsuarmi ilanngutassiortutsinnit Gustav Bourup Brobergimit maluinnaavigineqarput. Avannaata Qimussersuani ukioq manna peqataasut ilimagisamit sukkanerusut, taassuma oqaluttuaraa:
- Naatsorsuutigisatsinnit sioqqutsillutik tikikkiartorput. Tassa nalunaaqutaq marlunut tanneq qulit missaanni tikittussatut naatsorsuutigineqaraluarput, siulliilli marlunut tanneq arfineq-pingasut missaanni ingerlaarsimariarlutik apuukkiartortut paasitinneqarpugut, Gustav Bourup Broberg oqaluttuarpoq.
Siorna ajugaasoq William Jensen, Saqqaminngaanneersoq, ukioq manna aamma ajugaasoq, taassuma oqaluttuaraa:
- Apuuffissaannut pisimatitsiaannarlunga William Jensen Saqqaminngaanneersoq siulliulluni normu 1-iulluni tikippoq. Hans II Petersen, Ukkusissaninngaanneersoq taava tulliulluni apuuppoq, normu 2-julluni. Nuussuarmiu Aron Sakariassen normu 3-ulluni apuuppoq. Thomas Thygesenilu normu 4-tut inissippoq, Jonas Kristensenilu Kullorsuarminngaanneersoq normu 5-itut inissilluni, Gustav B. Broberg oqarpoq, nangillunilu:
- Nuannersorujussuarmik taakku tikerarput, kisianni imminnut akunneqalaallattaarput, 1-imiit 2-mut, 2-miit 3-mut, kisianni tassanngaanniit 5-imit tulleriiaasaannarlutik tikeralerput, Qeqertarsuarmi ilanngutassiortorput oqaluttuarpoq.
Qeqertarsuup nalaani sila ulluni kingullerni nalorninartorsiortitsisimavoq, silarlulluni, perlullunilu apisorujussuusimammat. Gustav Bourup Brobergilli oqaluttuaraa Avannaata Qimussersuanik aaqqissuisut ullaaq nalunaaqutaq arfineq qaangilaaraali piareersaalereersimasut, peqataasut aallarfissaat qamuteralaat atorlugit manngersarsimagamikku, aallarfissaat suliaralugu.