Atuagaq Nunatsinnut tunngasoq tuluttut atuarneqarsinnaalersoq
Atuagaq qallunaatooq "Balladen om Grønland" tuluttuunngortinneqarsimammat iluaqutaassajunnarsivoq.
- Kalaallit Nunaat qanoq-una ittoq, kikkut naalakkersorpaat, qallunaat kalaallilluunniit, imaluunniit suleqatigiinneranuna qanoq aaqqissuussaasoq. Nunami allamiuugaanni tamanna paasissallugu assut ajornakusoorsinnaasoq, tusagassiortoq atuakkiortorlu Martin Breum oqaluttuarpoq.
Ukiarmi atuakkiani "Balladen om Grønland" saqqummersippaa, nunat taakku akornanni pissutsinik samminnittoq. Tuluttuunngortinneqarneratigullu atuakkiortoq neriuppoq, nunani allamiut aningaasaliisinnaasut nunallu Kalaallit Nunaannik suleqateqarusuttut, atuagaq aqqutigalugu paasisaqarnerusinnaassasut.
- Nunani allamiunummi paasissallugu ajornakusoorsinnaavoq Danmark Kalaallit Nunaallu qanoq imminnut atanersut. Taamaattumik isumaqarpunga atuakkiara - Balladen om Grønland - nunat taakku akornanni pissutsinik samminnittoq tuluttuunngortinneqarneratigut nunarsuarmioqatitsinnut anngukkumaartoq.
Ilisimasaqalernissamut periarfissiisoq
"Balladen om Grønland" siorna novembarimi saqqummersitsisarfik Gyldendal aqqutigalugu saqqummersinneqarpoq, taakkuli tuluttuunngortinnissaa soqutigisimanngilaat.
Qallunaalli illersornissamut ilinniarfiata tamanna soqutigisimavaa, tuluttuumullu nutserneqarnissaanut ikiuukkusussimalluni.
- Iluanaarutiginavianngilara, aamma taakku iluanaarutiginavianngilaat. Akerlianik tuluttut oqaluttut tamarmik periarfissaqalerput paasiniassallugu Kalaallit Nunaata Danmarkillu akornanni pissutsit paasissallugit, Martin Breum oqaluttuarpoq.
Atuagaq e-bogitut taasartagaattut saqqummissaaq, aprilimiillu Danskit illersornissamut ilinniarfiata nittartagaatigut aaneqarsinnaalissalluni.
- Naliginnartut atuagaanngilaq tigummisinnaasaq. Elektroniskiussaarmi taamaallaat nittartakkakkut saqqummersinneqartoq, Martin Breum KNR-imut nassuiaavoq.
