Angutit inuiaqatigiinni kalaallini inissisimanerat sammineqalersoq
Naligiissitaanissamut Siunnersuisoqatigiit siulittaasortaavat Dorthe Korneliussen tusagassiorfinnut nalunaaruteqarluni taama allappoq.
Sammisassat pingaarnerit ilaattut angutit Nunatsinni inissisimanerisa ersarissaavigineqarnissaat siunniunneqarpoq, inuiaqatigiinni, ilinniagaqassutsikkut, ilaqutariinni suliffeqarnikkullu.
Kisitsisitigut paasissutissani takuneqarsinnaavoq Nunatsinni qaffasinnerusumik ilinniarfinni arnat amerlanerussuteqangaatsiartut.
Kisitsisittaaq takutippaat imminnut toquttartut, pinerluuteqarsimasunut inissiisarfinniittussanngortinneqartut, angerlarsimaffeqanngitsut persuttaasartullu amerlanerpaat tassaasut angutit.
AAMMA ATUARUK Angutinut naleqqiullugu arnat amerlanerit ilinniagaqartarput
- Peqqutaasut assigiinngitsuusinnaapput, tikkuaqqajaannarporli Nunatsinni nukappiaqqanik angutaalluartussatut perorsaariaaserput ukiorpassuarni attanneqarsimasoq, inuiaqatigiinni nutaaliaasuni isummersorfigeqqinneqartariaqarmat, Dorthe Korneliussen taama allaaserisaqarpoq.
- Peqataaffigerusupparput eqqartueqatigiinnikkut inooqataanermi, angutit arnallu naligiinnerusumik kivitseqatigiinnissaannut, angutaalluartut nutartikkat qanoq isikkoqarsinnaaneri maligassiuisinnaanerilu oqallisigitinneqarnissaat.
- Taamatuttaaq arnat eqqarsartaatsimikkut, inuiaqatigiinnilu tamat oqartussaaqataanerannik tunngavilinni tunuarsimaarlutik inissisimanerat eqqartorneqarpoq. Demokratiip iluani arnat angutillu naligiimmik oqaloqatigiilluartarnissaat anguniagaqaqatigiittarnissaallu meeraanermiilli ilinniagassaavoq pingaartoq, pisinnaatitaaffinnik ilisimasaqarluarnikkut periutsinillu attatiinnakkanik allanngortitsinikkut, Dorthe Korneliussen taama allappoq peqatigisaanillu sammineqartut pillugit paasisitsiniaanernik oqallissaarinernillu ingerlatsisoqarnissaanik neriorsuuteqarluni.
