Politiit ullormut nalunaarusiaat: Angut eqqusseriartoq tigusaasoq

Angut 20-t sinnerlugit ukioqartoq ikiaroornartumik eqqusseriaraluartoq Nuup Mittarfiani paasineqartoq Kalaallit Nunaanni Politiit tallimanngornerup ullaavani nalunaarutigaat.

- Ikiaroornartoq 484 grammiusoq angutip nassataasa akornanni nassaarineqarpoq, taamaammallu tigusaraarput, pigaartut pisortaat Preben Kleist ilisimatitsivoq.

Angut iperagaaqqippoq, kisianni pisoq politiit eqqartuussivimmi suliassanngortippaat.

- Suliap nanginneqarnissaa pillugu allanik paasissutissiisinnaanngilanga, pigaartut pisortaat oqarpoq.

Erngertumik pineqaatissiineq

Sapaatit akunneri marlussuinnaat matuma siornagut kingullermik erngertumik pineqaatissiisoqarpoq, taamani angut 51-inik ukiulik Danmarkimit Nuup mittarfianut tallimanngornermi novembarip 17-iani tikimmat ilanngaaserisunit tigusarineqarmat. Angutip kokaini katillugit 150 grammit iiorarsimagai aamma heroini 5 grammi cigarettit puuinut toqqorsimagai taamani paasineqarpoq.

Eqqartuussisoqarfik Sermersuup angut ukiuni sisamani affarmilu pineqaatissinneqarsimasunut inissiisarfimmiittussanngortippaa.

Angut 51-inik ukiulik taanna ikiaroornartumik eqqusseriartut qaammatit aappaata qeqqata ingerlanerani pingajussaraat.

- Ikiaroornartut sakkortunerit Kalaallit Nunaannut eqquteriarneqartarnerat maluginiarparput. Tamaammat ernumavugut. Ikiaroornartut sakkortunerit eqqunneqartarsimappata inuiaqatigiinnut kingunerlutsitserujussuarsinnaammata, Kalaallt Nunaanni politiit erngertumik pineqaatissiinermut atatillugu taamani oqarput.

Politiit aamma mianersoqqusipput, ikiaroornartoq inuup, iioraasimalluni anngiortumik eqqusseriartup inuuneranut peqqissusaanullu navianarluinnarsinnaammat. 2022-mi juunip novembarillu akornanni inuit pingasut ikiaroornartumik iioraasimanertik toqqutigaat.

Nalunaarsukkat kingulliit novembarip 20-at 2023-meersut malillugit – ikiaroornartut pillugit inatsimmik unioqqutitsisimasutut nalunaarutigineqartut 509-usimapput, siorna taamaalinerani 493-iusimasut. Qaffariaat 3 procentiuvoq.

Angutip 51-inik ukiullip erngertumik pineqaatissinneqarnerata saniatigut arnaq 34-nik ukiulik hashimik 1,4 kiilumik eqqusseriartutut oktobarip aallartinnerani qaammatini tallimani pineqaatissinneqarsimasunut inissiisarfimmiittussanngorlugu eqqartuunneqarpoq.

Angut ippassaq tigusarineqartoq qaqugu eqqartuussivimmi sassartinneqassanersoq nalunaarutigineqanngilaq.