Angut kokainimik heroinimillu anngiortumik eqqussineq pissutigalugu erngertumik pineqaatissinneqartoq
Angut 51-inik ukiulik Danmarkimit Nuup mittarfianut tallimanngornermi novembarip 17-iani tikimmat ilanngaaserisunit tiguneqarpoq.
Angutip iiorarsimasai kokaini 150 grammi kiisalu heroini cigarettit puuinut toqqorsimasai nassaarineqarput.
Kalaallit Nunaanni Politiit tusagassiuutinut nalunaarummi allapput.
Tigusarinninnerup aqaguani Eqqartuussisoqarfik Sermersuup angut ikiaroornartumik anngiortumik eqqusseriarsimasutut eqqartuuppaa, taannalu erngertumik pineqaatissinneqarluni ukiuni sisamani qaammatinilu arfinilinni pineqaatissinneqarsimasunut inissiisarfimmiittussanngortinneqarpoq.
Angut suliaq saqqummiunneqarnera nassuerutiginnippoq, taamaammat eqqartuussivimmi suliaq nassuerutiginninnermi suliatut ingerlanneqarluni.
Unnerluutigineqartup unnerluussisussaatitaasullu eqqartuussut akueraat, suliarlu taamaalilluni tamaani naammassineqarluni.
Pineqaatissiissut Danmarkimi pineqaatissiissummit pingasoriaammik sakkortunerusoq
Qaammatip affaata ingerlanerani inunnik ikiaroornartumik anngiortumik eqqusseriaraluartunik pingajussaanik erngertumik pineqaatissiisoqarpoq. Tamanna nalinginnaaneruleriartuinnartutut politiit inerniliissutigisinnaanngikkaluarlugu suliat ilungersunarluinnartutut isigaat.
- Ikiaroornartut sakkortunerusut nunatsinnut eqqussorneqaleriartutut ilimasuutigaarput. Tamanna ernumassutigilluinnarparput, inuiaqatigiinnummi kingunerluutaangaatsiassaaq.
- Ullut 14-iunngillalluunniit qaangiupput angut alla hashimik amfetaminimillu anngiortumik eqqussineq pissutigalugu erngertumik aamma pineqaatissinneqarmat, taamaammat ikiaroornartunut tunngasoq maluginiaavigilluinnassavarput, Kalaallit Nunaanni Politiit misissueqqissaarnermut immikkoortortaani aqutsisoq, politikommissær Malik Sandgreen, tusagassiuutinut nalunaarummi oqarpoq.
Ikiaroornartoq inuup, iioraasimalluni anngiortumik eqqusseriartup inuuneranut peqqissusaanullu navianarluinnarsinnaasoq politiit aamma mianersoqqussutigaat. 2022-mi juunip novembarillu akornanni inuit pingasut ikiaroornartumik iioraasimanertik toqqutigaat.
Taamaammat inuit anngiortumik eqqusseriaraluarlutik tigusarineqartut pineqaatissinneqartarnerat sakkortummat politiit nuannaarutigaat.
- Nunatsinnut ikiaroornartumik anngiortumik eqqusseriaraluaraanni akitsuuserisunit paasisaanissaq ilimanarluinnarpoq. Eqqartuunneqaraannilu eqqartuussut Danmarkimi pineqaatissiissutigineqartartumit pingasoriaatip missaanik annerusoq naatsorsuutigineqarsinnaavoq.
Naatsorsueqqissaarneq kingulleq naapertorlugu 2023-mi novembarip 20-ata tungaanut ikiaroornartoq pillugu inatsimmik unioqqutitsinerit 509-upput, siorna piffissami tassani 493-iupput. Tamanna 3 procentimik qaffariarneruvoq.
