40-nik ukiullip ikiaroornartunik anngiortumik eqqussiniarneq nassuerutigaa erngertumillu pineqaatissinneqarluni

Angutip hashi 500 grammi amfetaminillu 40 grammi Danmarkimit nunatsinni anngiortumik marlunngormat eqquppaa.

Kalaallit Nunaanni Politiit tusagassiuutinut nalunaarummi allapput.

Angut, 40-nik ukiulik ikiaroornartunik nassataminiitsitsivoq. Tamannali Ilulissani mittarfimmi akitsuuserisunit paasineqarpoq. Angut tigummigallagassanngortinneqarpoq ikiaroornartunillu tuniniaanissamik siunertaqarnermini inatsisinik unioqqutitsisutut pasineqarluni.

Eqqartuussisoqarfik Qaasuitsup angut qaammatini qulingiluani pineqaatissinneqarsimasunut inissiisarfimmiittussanngortippaa. Uanilu erngertumik eqqartuussuteqartoqarpoq – angutimmi pisuunini eqqartuussivimmi suliap aallartinneqanngilaarnerani nassuerutigigaa. Angut mittarfimmi unitsinneqarami pinngitsuuneraqqaaraluarpoq.

Kalaallit Nunaanni Politiit unnerluussisussaatitaasuinit unnerluussisussaatitaasuuneq, Martin Standby Nielsen ima oqarpoq:

- Tamanna soorunami ilorrisimaarutigaara, tamanna nassuerutiginninnermi suliat naleqassusaannik aamma takutitsivoq, tamannami illuatungeriinnut tamanut suliap sivisuumik ingerlanissaanik sipaaruteqarfiummat.

Angutip eqqartuussut akueraa.