Illersornissaq pillugu isumaqatigiinniarnerit: Aleqap illersornissamut ministeri ataatsimeeqatigigaa
Illersornissaq pillugu nutaamik isumaqatigiissuteqarnissamut Folketingimi maanna isumaqatigiinniartoqarneranut atatillugu tamanna pivoq.
Danskit naalakkersuisuisa isumaqatigiissummut 2018-imit 2022-p tungaanut atuuttussamut siunnersuutaanni immikkoortut pingaarnerit tallimaasut ilagaat Issittoq.
Danskit naalakkersuisuisa siunnersuutigaat kalaallit inuusuttut Danmarkimi imaluunniit Sakkutuut imarsiortut umiarsuaanni Atlantikup avannaata imartaani alapernaarsuisuni sakkutujusussaatitaanissaat ajornannginnerulersinneqassasoq.
AAMMA ATUARUK Isumaqatigiinniarnerit ingerlanneqaraluartut Aleqa Folketingimi najuutinngilaq
Illersornissamut ministerip ataatsimiinnermi paasissutissiissutigaa kalaallit inuusuttut piginnaasusaat nalilersorniarlugit siunissami Danmarkiliartinneqartariaqartassanngitsut, Aleqa Hammond tusagassiorfinnut nalunaaruteqarluni taama allappoq.
- Inuusuttut piginnaasusaat nalilersorniarlugit Danmarkiliartinneqartariaqartassanngillat. Taavalu sakkutuutut sungiusarnermik nalaanni akeqanngitsumik angerlaqqinnissaminnut neqeroorfigineqartassasut. Tamannalu kalaallit kissaatigisaasa tusaaniarneqarsimanerannut takussutissaavoq, Aleqa Hammond taama allappoq.
AAMMA ATUARUK Nunarput ullormut oqaluuserisassani aallaqqaataaniit
Issittumi illersornissaq nukittorsarneqassasoq
Folketingimi amerlanerussuteqartut Illersornissamut qullersaqarfiup Issittumi suliassai pillugit isumaqatigiissummut immikkoortoq 2016-imi decembarip qaammataani akuersissutigaat, taannalu Illersornissamut ministereqarfiup Issittoq pillugu missueqqissaarneranik siorna aasakkut saqummiunneqartumik ilaatigut tunngaveqarpoq.
Folketingimut ilasortat atlantikup avannaaneersut arlaannaalluunniit isumaqatigiissutip isumaqatigiinniutigineqarneranut taamani peqataatinneqanngillat.
Tamannalu kingorna Aleqa Hammondimit Aaja Chemnitz Larsenimillu (IA) isornartorsiorneqarpoq. Illersornissarlu pillugu isumaqatigiinniarnerit maanna ingerlanneqartut sioqqullugit taakku illersornissamut ministerip Claus Hjort Frederiksenip ataatsimeeqatiginissaanut maanna aggersarneqarsimapput.
AAMMA ATUARUK Issittumut pilersaarut danskit naalakkersuisuisa utaqqiniarpaat
Tamannalu Issittup nunani tamalaani politikkikkut pingaaruteqarneranut takussutissaasoq, Aleqa Hammond taama isumaqarpoq.
- Pingaaruteqarpoq isummannaallisaanermi oqartussaaffeqarfitsinnillu illersuinitsinni inerisaajuarnissaq.
Takusinnaavaralu illersorneqarnissaq pillugu isumaqatigiissummi tamanna nukittorsarniarneqartoq, Aleqa Hammond tusagassiorfinnut nalunaarummi taama allappoq.
Aleqa Hammond naapertorlugu Claus Hjort Frederiksenip ataasinngormat ataatsimeeqatigiinnermi oqaatigaa isumaqatigiissutip atuunnerata nalaani paasinarsissagaluarpat Issittumi nakkutilliinermi tulleriaarinernilu allannguisoqartariaqartoq nakkutilliinerullu annertusisariaqalerneranik kinguneqarsinnaanera ammaffigineqartut.
AAMMA ATUARUK IA vil have flere grønlændere i Forsvaret og færre besparelser