OQALLINNEQ Aatsitassat takornariaqarnerlu sammineqassapput

Takornariaqarneq aatsitassarsiornerlu nunatta aningaasatigut isaatitsiffigilluarsinnaasaata ilagaat. Partiit amerlanerit taama isumaqarput. Ukiuni aggersuni aatsitassarsiortoqarlunilu aatsitassanik piiaasoqassava? Uranitalinnik piiaanissamut naaggaarluinnarneq qanoq pineqassava? Kujataani mittarfiliortoqarneratigut takornariaqarneq siuarsarneqarsinnaava? Taamaappat, takornariaqarneq nunatta aningaasaqarneranut qanoq sunniuteqartigissava?

Atassutip siusinnerusukkut oqaatigereerpaa Qaqortumi mittarfiliornissamik Siumup siunnersuutaa ilalerlugu. Partiillu taakku marluk takornariaqarnermut siuarsaataassangatippaat, Atassullu sinnerlugu qinigassanngortittup Knud Flesicherip taamatut isumaqarnermigut nunatta aningaasatigut isaatitsineranut taamatullu aamma aningaasaqarnitsinnut ilaqutaassangatippaa.

Aamma atuaruk VIDEO IA, Siumut Atassullu Qaqortumi mittarfittaarusupput

Erngup nukinga nukissiuutigalugu annertuumik suliffissualiornissamut periarfissat pillugit isumaqatigiinniarnerit siuarsarneqarnissaat Atassutip sulissutiginiarpaa, aammalu ujaqqanik erlinnartunik katersat tunngavigalugit suliffeqarfinnik pilersitsiniarneq ajornannginnerulersikkusullugu.

- Kalaallit Nunaanni aatsitassarsiornikkut annertuumik ingerlatsinissamut piumasaqaatinik atugassarititaasunillu naammassisaqartut tamaasa tikilluaqquagut, ingerlatseqatigiiffiillu akissutissarsinissaminnut pisariaqanngitsumik utaqqititaasassanngillat, Atassut taama allappoq.

Siumup aatsitassarsiornerup tungaatigut aningaasatigut isaatitsinissamut periarfissat amerlisarniarpai. Ilaatigut aatsitassarsiornerup iluani ilinniartitaanerit nukittorsarniarpai aningaasalersuisartunillu avataaneersunik nunarput pilerinarnerusunngortikkusullugu. Kujataanilu mittarfiliornikkut takornariat amerlanerusut tikittalernissaat qulakkeerniarneqarpoq, taamaaliornikkut nunatta aningaasaqarnerata siumut-saatsinniarnissaa qulakkeerniarlugu.

- Inuussutissarsiutini siuariartortitsissaagut, aalisarnermi, sanaartornermi, takornariartitsinermi aatsitassarsiornermilu isertitat annertunerulersillugit. Naatsumik oqaatigalugu inuit
amerlanerusut sulilersinneqassapput aammalu inuusuttut amerlanerusut ilinniagaqalersinneqarlutik. Tamakkuli anguneqassappata
aningaasalersuisoqartariaqarpoq, aammalu
inuussutissarsiortut pitsaanerusumik atugassaqartinneqartariaqarlutik. partiip siulittaasua Kim Kielsen taama allappoq.

Aamma atuaruk Bernhardt Olsen (S): Takornarialermik ilinniarfik Ilulissanut nuunneqarli

Demokraatit isumaqarput takornarialerinermik ilinniakkanik nutaanik aallartitsisoqartariaqartoq aammalu Islandimi takornarianik angallassisartutut ilinniartitaaneq, Adventure Guide, isumassarsiorfigineqarsinnaasoq. Assersuutigalugu Islandip suleqatiginissaanik isumaqatigiissuteqarfigineratigut kalaallit inuusuttut siunissami Islandimi ilinniarsinnaanissaat qulakkeerniarneqassasoq.

- Takornariartitsisartut ullumimut naleqqiullugu tammaviuttussarsiortunik, nuannariinnarlugu aalisartartunik misigisassarsiortartunillu sullissinerminni periarfissaat pitsanngorsarusuppagut. Takornariat amerlanerusut pilerisulissapput kinguneranillu inuiaqatigiinni aningaasarsiorneq pitsanngorsarneqassaaq, Demokraatit taama allapput.

Partii isumaqanngilaq nunatsinni takornariartitsinerup siuarsarneqarnissaanut atatillugu mittarfiliortoqassasoq. Takornariat amerlisarneqarnissaannut timmisartumut billettit akiisa appartinneqarnissaat orniginartinneruaat.

Aamma atuaruk Takornariaqarneq siuarsarneqassappat billittit akikinnerulertariaqarput

Aatsitassarsiorneq periarfissarpassuaqartutut Demokraatit isigaat, uuliamik qalluinissamik piiaavinnillu piviusunngortitsisoqarpat tamanna nunatta aningaasatigut isaatitsiffigisaata annersarilersinnaammagu.

Ingerlatseqatigiiffiit nunanit tamalaaneersut inuiaqatigiinni akisussaaqataanermik sapinngisamik annertunerpaamik tigusinissaminnut pisussaaffilerneqassapput. Ingerlatseqatigiiffiit sulisuminnik nunaqavissunik piginnaanngorsaqqiinissamut aammalu ilinniartitsinissamut suliniuteqaqataanissaat aammalu suliassamut pineqartumut tunngatillugu atortulersuutitigut ineriartortitsinermik isumaginninnissaat partiip qulakkeerusuppaa.

Inuit Ataqatigiit takornariaqartitsinermi atugassarititaasut pitsanngorsarusuppaat. Suliffeqarfinnik aallarnissaasut nuna tamakkerlugu amerlisarneqassapput nittarsaassinerusoqarlunilu. Tamannalu Naalakkersuisut aningaasatigut tapiissuteqarnerisigut pissaaq. 

- Nittarsaassinermik suliniuteqarneq inuussutissarsiuteqartut Visit Greenlandilu qanittumik suleqatigalugit ataqatigiissaarneqartariaqarpoq. Piffissap takornarialeriffiusup sivitsorneqarnissaa sulissutigineqartariaqarpoq, Inuit Ataqatigiit taama allapput. 

Aamma atuaruk IA: Takornarissat tikittartut marloriaatinngortikkusuppagut

Peqatigitillugu partii isumaqarpoq aatsitassarsiornerup ineriartortinneqarnera nunatta aningaasaqarniarneranut iluaqutaasinnaasoq, tamatumanilu innuttaasut aalajangeeqataatinneqarnissaat pingaartillugu.

Aamma atuaruk Aatsitassanut politikki isumaqatigiinngissutaasoq

Partii Inuit: Takornariaqartitsineq periarfissinneqarli annerusumillu ineriartorfiutillugu. Partii isumaqarpoq takornarianik angallassisartut nunanit allaneersut atornagit nunaqavissunik atuisoqarnerusariaqartoq. 

- Maannakkorpiaq takornarianik angallassisartut amerlanerpaartaat nunani allaneersut takornialeriffiup annertunerpaaffiani tikittarput naagaangallu angerlaqqittarlutik. Tamanna pitsaanerumik aaqqissuussinnaavarput, kalaallimmi kulturiannik ilisimasalinnik pisariaqartitsivugut. Nunatsinni takornariaqartitsineq ineriartortissinnaavarput nunaqavissunik piginnaanngorsaanikkut amerlanerusunillu ilinniagaqartoqarneratigut, Partii Inuit siulittaasuat Nikku Olsen, KNR-imut taama oqarpoq.

Aatsitassarsiornikkut suliniutaasinnaasunut tunngatillugu innuttaasunik peqataatitsinissaq Inuit Ataqatigiit kisimiillutik pingaartitarinngilaat. Partii Inuit erseqqissumik oqaatigaat nunatsinni innuttaasut tusarniaaffigeqqaarlugit aalajangiisoqartassasoq.  

Partii Naleqqap Partii Inuit assingalugit takornarianik angallassisartut kalaallit amerlanerunissaat kissaatigaa. Takornariartitsinerup annertunerulersinneqarneratigut nunaqarfinni suliffinnik amerlanerusunik pilersitsiffiusinnaasoraat.

- Takornariaqarneq nunanit allanit aningaasarsiorfigineqarpoq, nunatsinnilu takornarialerisut inuussutissarsiuut taanna aningaasatigut iluanaaruteqarfiginngilaat. Tamanna mumisittariaqarparput, partiip qinigassanngortitaa Ole Thorleifsen taama isumaqarpoq.

Aamma atuaruk Partii Naleraq: Takornarianik angallassisartut avataaneersut atornagit

Uuliasiornerit aatsitassanillu piiaanerit innuttaasunik peqataatitsinikkut aammalu kattuffiit suleqatigalugit ingerlanneqarnissaat partiip sulissutiginiarpaa.   

Politikerit unnugu sisamanngornermi novembarip 13-iani KNR tv-kkut qineqqusaarnermi isummersulerpata paasisaqarnerugit. Nal. 19:30 kalaallisut danskisullu nal. 21:00 oqallittoqassaaq - aallakaatitallu tamaasa KNR2-kkut toqqaannartumik nutserneqassapput.