Partii Naleraq: Takornarianik angallassisartut avataaneersut atornagit

Takornarialerisuniillu erseqqissaatigineqartoq tassaavoq nunatsinneersut angallassisartut naammattut pigineqannginneri pissutigalugit avataaneersunik sulisoqartartoq.

Takornarialerinermiillu aningaasat isaatinneqartut nunanut allanut nakkartarneri Thorlefsenip ernummatigaa, nunanit allaneersut takornarialerisut mattunneqarnissaat taamaattoq sulissutiginiarpaa.

Taamaattoqarsinnaanngilarli, takornariat pillugit siunnersuisooqatigiit, takornarianut nunarput pilerinarsarlugu suliaqartartut oqaatigaat.

- Takornariartitsisartut iluanaarutaat nunatsinnit aniaannarsinnaanngillat, unitsittariaqarpagut nunatsinnut, Ole Thorleifsen oqarpoq.

Inatsisit allanngortinneqarnerisigut nunanit allaniit takornarialerisartut nunatsinnut mattunniarpai, nunatta avataaneersunik takornarianik angallassisartut atorneqartarnerat unitsinnissaa qulakkeerniarlugu.

Nunatta avannanni takornarianik ingerlatsisut Ilulissaneersut World of Greenland assersuutigai. Taakku angalatitseqatigiiffinnik Danmarkimeersunik suleqateqarput, namminnerlu angallassisussatik tikisittarlugit.

Tamannalu tunngavissaqarluarpoq:

Takornarianik angallassisartut nunatsinneersut amigaataasarnerat ilumoorsinnaasoq,  World of Greenland Ilulissaniit ingerlanneqartumit sulisoq Tina Madsen taama oqarpoq.

Aamma atuaruk Bernhardt Olsen (S): Takornarialermik ilinniarfik Ilulissanut nuunneqarli

- Takornariat aasakkut amerlaneranni takornarianik angallassisartut 20it atorfissaqartinneqartarput, nunatsinniillu qinnuteqartartut naammanneq ajorput,  taamaattumik qallunaanik sulisoqartarpugut aasap ingerlanerani, Tina Madsen oqarpoq.

Taassuma oqaatigisai Visit Greenlandimi pisortap Anders Stenbakkenip taperserpai.

- Takornarianik angallassisartunik nunatsinni taama amerlatigisunik peqanngilaq , taamaattumik allatut ajornartumik  takornarianik angallassisartunik avataaneersunik sulisoqartariaqartarput,  tamannalu akunnattoorfiusartoq tassaavoq, nunatsinni takornarianik angallassisartunik naammattunnik peqanngimmat,  Anders Stenbakken oqarpoq.

Ole Thorleifsenip nunatsinni takornarianik sullissisut aningaasarsiulernissaat qulakkeerusuppaa.

- Nunatsinni takornariartitsisarneq nunatta avataaniittunut iluanaarutaavoq, nunatta iluani iluanaarutaanani taannalu illuatungaanut saatittariaqarparput, Ole Thorleifsen, Partii Naleraq sinnerlugu inatsisartunut qinigassanngortittoq oqarpoq.

Takornariat pillugit siunnersuisooqatigiit aperigukkit tamanna eqqarsarluarnerunngitsoq taakkua oqaatigaat, tikkuarlugulu nunanit allaneersut aningaasaateqarluartut attaveqarluartullu suleqatiginissaat pingaaruteqarluinnartuummat,  takornariat amerlanerusut nunatsinnukarnissaannut qulakkeerinnittussaammata:

Visit Greenlandimi suliat pingaarnersaraat nunatsinni takornariartitsiviit sullinneqarnissaat, taassuma saniatigut takornariartitsivinnik nunanit allaniittunik suleqateqarnissaannik suliaqarneq,  Anders Stenbakken oqarpoq, - inatsisit periarfissiipput  nunatsinni takornariartitsiviit suliffeqarfinnik  nunanit allaneersunik suleqateqarnissaannik   taakkua aningaasaliisinnaanissaminnik periarfissaqarnerupput aamma   takornarianik takornariartitsivinnillu amerlanerusunik attaveqarput , Anders Stenbakken oqarpoq.

Campus Kujallermi issittumi takornarianik angallassisartutut ilinniarneq 2013-mi aallartinnerata kingorna 26-it naammassisimapput. Taakkunanngalu pingajorarterutaat aasat tamaasa tamakkiisumik angallassisutut sulisarput, pingajorarterutaatalu aappaat ilaannaatigut angallassisuusarput, sinneruttullu qaqutikkut sulisarlutik, Campus Kujallermi Issittumi Takornarianik Angallassinermut Ilinniarfimmi aqutsisoq Henrik Ebbe Nielsen oqarpoq. Taassumalu nuannaarutigaa issittumi takornarianik angallassisartutut ilinniagallit 75%-ii ilinniaqqittarmata.