Aatsitassanut politikki isumaqatigiinngissutaasoq

Qinersinissaq sioqqullugu partiit akornanni suleqatigiissinnaaneq innuttaasullu avissaarsimaqisut katersuuffigisinnaasaannik isumaqatigiinniarsinnaaneq eqqartorneqarpoq. Aatsitasassaqarnerulli iluani partiit annerit marluk isumaqatigiinnginnerat erserpoq.
Allattoq Mads Pedersen
oktobarip 06-at 2014 14:32

Aatsitassanik qinngornernik ulorianartunik akulinnik attueqqusinngilluinnarneq Siumut Atassutillu amerlanerussuteqarlutik 2013’imi atorunnaarsippaat. Tamannalu ulloq manna tikillugu Inuit Ataqatigiinniit isumaqatigineqanngilaq, taakku isumaqaramik innuttaasunik taasititsinikkut inuiaqatigiit isumaat tusarniaqqaarneqartariaqartut.


- Inuit Ataqatigiinniit isumarput allanngunngilaq, tassaavorlu aatsitassanik qinngornernik ulorianartunik akulinnik piiaanissamut akuersaanngilluinnarnerput attapparput. Isumaqarpugullu innuttaasunik taasititsinikkut inuiaqatigiit suna kissaatigineraat paasiniartariaqaripput, Inuit Ataqatigiit siulittaasuat Sara Olsvig KNR’imut oqarpoq.

 

Taassuma erseqqissaatigaa illuinnaasiunngitsumik paasissutissanillu piviusunik innuttaasut saqqummiiffigineqarnissaat, taakkulu tunngavigalugit taasitinneqarnissaat kissaatigalugu.


Akerleriinneq

Attueqqusinngilluinnarneq atorunnaarmat uranisiortoqalernera Inuit Ataqatigiit aarleralugu arlaleriarlutik oqariartuutigisarpaat.

 

Naalakkersuisulli siulittaasorigallagaata Kim Kielsenip Siumumeersup aatsitassanik qinngornernik ulorianartunik akulinnik attueqqusinngilluinnarnerup atorunnaarsinneqarnera uranisiortoqalerneranik isumaqanngitsoq erseqqissaatigaa .

 

- Attueqqusinngilluinnarnerup atorunnaarsinneqarnerani Nunatta aatsitassarsiornikkut aningaasarsiornissamut periarfissanik misissuinissamut ammaassinissaq siunertaavoq, attueqqusinngilluinnarneq atuutsileqqinneqassagaluarput Nunatta aatsitassanik aningaasarsiornissamut periarfissanik ujartuinera mattunneqassaaq, Kim Kielsen nassuiaavoq.

 

- Naalakkersuinikkut nikittoqarnerit tamaasa politikki allanngortassappat aningaasaleerusuttut, Nunatta avataaneersut, annaassavagut. Aalaakkaatsumik aaqqiissuteqartariaqarpugut. Taamaammat aatsitassanik qinngornernik ulorianartunik akulinnik piiaasinnaanissamut akoqassusaata kikllissaanik partiit akornanni naapiffeqarsinnaanissaq orniginartinneruara, Kim Kielsen nassuiaavoq.

 

Inuit Ataqatigiilli isumartik attatiinnarpaat.

 

- Oqartoqarpoq qinngornernik ulorianartunik attueqqusinngilluinnarneq atulerseqqinneqarpat Nunatsinni aqutsineq aalaakkaasuunngitsutut isiginiarneqassasoq. Kisianni attueqqusinngilluinnarneq atorunnaarsinneqarmat aalaakkaasumik politikkikkut ingerlatsineq atuutinngereerpoq, innnuttaasut illuatungiliuttullu aalajangiinermi tusaaniarneqanngimmata. Taamaammat innuttaasut kiissaataat paasineqarnisaa pisariaqarpoq, Sara Olsvig isumaqarpoq.