Kammagiinneq pillugu atuakkiaq nersornaasigassatut innersuunneqartoq
Atuagaq ikinngutigiinnermut tunngavoq allagartalersugaananilu, taamaalilluni assit atorlugit meeqqat inersimasullu namminneq takorluuinerminnik oqaluttualiorsinnaasut, Milik Publishing allappoq.
Maja-Lisa Kehlet Nuummi inunngorlunilu peroriartorpoq. Londonimili maanna najugaqarpoq, titartaasartuullunilu assiliartalersuisartuulluni. Taanna Playstationimut qarasaasiatigut pinnguaammik Dreamsimik maanna suliarinneqataavoq. Maja-Lisa nammineq atuakkiaminik 1-2-3-mik Sørine Steenholdillu atuakkiaanik Zombiet Nunaannik assiliartalersuisuuvoq.
AAMMA ATUARUK Georg Olsen Nipilersortartumut nersornaasiuttakkamut innersuunneqartoq
Nersornaaserneqartussatut piukkunneqartut Nunat Avannarliit Killiit Siunnersuisoqatigiivisa Savalimmiuni Tórshavnimi ukiumoortumik ataatsimiinneranni pingasunngormat saqqummiunneqarput.
Atuakkap assiliartalersukkap nunatsinneersup piukkunneqarnerata saniatigut savalimmiormiup, Bárður Oskarssonip atuakkiaa Træið (Orpik) kiisalu islandimiup Kristín Ragna Gunnarsdóttirip atuakkiaa Úlfur og Edda piukkunneqarput.
AAMMA ATUARUK Naja Rosing-Asvid aamma Lene Therkildsen nersornaammut innersuunneqartut
Nersornaaserneqartoq meeqqanut inuusuttunullu atuakkiat pillugit Reykjavikkimi Mýrinimi festivalertoqarnerani oktobarip aqqaneq-aappaanni saqqummiunneqassaaq. Nersornaat ukiut tamaasa tunniunneqartarpoq 60.000 koruuninillu aningaasartaqarluni.
Kalaallit Nunaanni, Savalimmiuni Islandimilu naliliisartoqatigiit nunanit tamanit atuakkamik ataatsimik toqqaasarput. Tamatumalu kingorna nunani avannarlerni aalajangiisartoqatigiit nunanit taakkunannga pingasunit ilaasortaqartut atuakkamik nersornaaserneqartussamik toqqaasarput.
